Conveniu pa esparder el patrimoniu oral

El Conseyu de Gobiernu del Principáu d'Asturies aprebó ayeri la firma d'un Conveniu que va tener por oxetivu la regulación de la collaboración ente l'Alministración del Principáu d'Asturies y la Fundación Municipal d'Educación, Cultura y Universidá Popular del Conceyu de Xixón al traviés del Muséu del Pueblu d'Asturies pal desarrollu del proyectu "Documentación, custodia y espardimientu del Patrimoniu Oral d'Asturies". Con un presupuestu de 32.000 euros el proyectu tien como oxetivu final el de poner a dimposición de los ciudadanos un material documental onde puean ver de manera sistematizada y na so globalidá la tradición oral y los vezos patrimoniales de la socidá asturiana. Amás d'ello preténdese que col so desarrollu se-yos facilite a los especialistes de dellos ámbitos académicos y al conxuntu de los museos de la Rede de Museos Etnográficos d'Asturies un fondu documental que-yos sirva de puntu de partida a la caracterización y estudiu d'esti patrimoniu desde diferentes disciplines.