Continúa recibiendo sofitos la enmienda d'oficialidá del asturianu nes agrupaciones socialistes

Destaca'l sofitu consiguíu a la enmienda de Socialistes pola oficialidá en Xixón, Samartín del Rei Aurelio y Llaviana.

Esti xueves aprobóse con gran sofitu la enmienda d'oficialidá del asturianu nes asemblees de les agrupaciones socialistes de Xixón, la mayor de la FSA, por alcuerdu de consensu, y en Samartín del Rei Aurelio, la tercer más numberoses del partíu, amás d'en Nava y Colunga. Destaca tamién l'aprobación que tuvo la enmienda de Socialistes pola oficialidá en Llaviana, l'agrupación del secretariu xeneral electu de la FSA-PSOE, Adrián Barbón.

Estos sofitos súmense a los d'estos díes atrás de les agrupaciones d'Uviéu, Llangréu, Siero, Llanera, L.lena, Sobrescobiu, Villaviciosa, Parres, Sariegu, Ayer y Candamu, amás de les Mocedaes Socialistes d'Asturies (JSA/MSA) y la sectorial autonómica d'educación de la FSA.

Dende Socialistes pola Oficialidá consideren qu'esti sofitu masivu demuestra que la oficialidá xenera consensu nes bases de les agrupaciones socialistes y que ye tamién un asuntu que cada vegada tien un mayor sofitu ente los dirixentes socialistes de tolos sectores, convirtiéndose nun elementu que xune a los socialistes asturianos alredor del deséu de ser parte de la solución de los problemes que lleven al asturianu escontra la so desapaición, de nun tomase les midíes necesaries, que pasen pela midida que marca la Constitución española, la oficialidá.

A lo llargo de la selmana la enmienda de Socialistes pola oficialidá que propón que la FSA asuma la oficialidá del asturianu votóse nes principales agrupaciones por númberu de militantes y va llegar la selmana que vien al Congresu autonómicu con un gran consensu construyíu alredor de la midida, lo que-yos  fai ser optimistes sobre les opciones de que la FSA-PSOE se sume al consensu en favor del asturianu.