Continúa la campaña #YoApúntome pa promocionar la matriculación en Llingua Asturiana y Lliteratura

El Gobiernu emplega per tercer añu’l lema #YoApúntome –#EuApúntome pa la zona falante de gallego-asturiano– pa fomentar la matriculación na materia de Llingua Asturiana y Lliteratura. El plazu pa Primaria abrióse esti xueves, mentes que pa Secundaria y Bachilleratu comienza’l 2 de xunetu.

Cartelos, ‘flyers’ y tarxetones dixitales yá se pueden ver dende hai selmanes nos centros educativos del país como parte d’una campaña entamada dende l’Alministración que se complementa con publicidá en medios dixitales y redes sociales. L’oxetivu ye esplicar a les families y a los escolinos los beneficios que conlleva la materia de Llingua Asturiana y Gallego-asturiano, qu’en Primaria ye voluntaria  –cola altenativa de Cultura Asturiana, en castellanu– y en Secundaria y Bachilleratu optativa en competencia con otres materies y llingües estranxeres.

Asina detállase que “deprender asturianu aumenta la competencia en comunicación llingüística”, yá que “ayuda a tener un repertoriu fonolóxicu más ricu y con más posibilidaes sintáctiques, y polo tanto una mayor competencia en comunicación llingüística y meyores habilidaes pa la resolución de problemes, conocimientu del mediu, dominiu de los conceptos espacio-temporales…”. Tamién que tener conocencia fonda de la llingua asturiana “ye mui beneficioso pa deprender otros idiomes y va avéranos a llingües romániques como l’italianu, el gallegu, el portugués, el francés, el catalán…”.

D’igual forma, dar la materia permite “abrir una puerta a la so lliteratura, al universu de les sos creaciones, al descubrimientu de mundos nuevos, d’otres formes de cuntar y de pensar” y posibilita “una meyor integración cultural na sociedá actual”. El periodu de matriculación en Primaria va dende güei al día 22, mentes qu’en Secundaria y Bachilleratu ábrese’l 2 de xunetu y zárrase’l 13.