Continúa la busca de la muyer desapaecida en Cabrales pola rotura d’una canal d’agua

Los efeutivos de rescate reanudaron esti vienres, a les 8 hores, la busca de la muyer desapaecida n’Arenas na nueche del miércoles tres una rotura d’una canal. Nun se descarta que l'agua arrastrara a esta persona fuera de la so vivienda.

Según informó’l 112-Asturies, al operativu sumáronse dos máquines retro pesaes, una mini-retro y un camión. Tamién tomen parte trés efeutivos y dos mandos de Bomberos d’Asturies, dos téunicos del Departamentu de Proteición Civil del 112-Asturies y una cuadriella d’E.ON, empresa responsable de la canal, amás de los efeutivos del GREIM de la Guardia Civil y axentes del institutu armáu.

Ayeri, más d’una trentena d’efeutivos participaron dende primer hora de la mañana en les tarees de busca y rastréu de la muyer, Carme Lobeto, de 77 años, asina como na retirada gradual de los restos de la vivienda de la desapaecida en Valdelabarca. A pesar del esfuerzu fechu hasta’l momentu, l’operativu nun pudo dar cola muyer. Bomberos d’Asturies nun descarta que la fuercia del agua desplazara a Lobeto lloñe de la vivienda, que resultó arrasada, y la busca tamién ta faciéndose na redolada de la zona afeutada. Nel soceso resultaron feríes otres trés persones, que tuvieron que ser treslladaes al Hospital Grande Covián de Les Arriondes.