Consumu recuerda'l derechu a asistencia o indemnizaciones por cancelaciones o retrasos en vuelos

Los viaxeros tienen derechu a una compensación d'ente 250 y 600 euros por una espera de más de trés hores. L’Axencia de Sanidá Ambiental y Consumu recuerda a los pasaxeros afeutaos polos retrasos y cancelaciones de vuelos que deberíen recibir asistencia nel aeropuertu y cobrar indemnizaciones.

Énte la suspensión de dellos viaxes que se tán produciendo estos díes, tanto na terminal de Santiago'l Monte como n’otres instalaciones aeroportuaries del Estáu, Consumu aconseya a los viaxeros que se pongan en contautu cola compañía aérea o l’axencia onde adquirieren el billete o’l viaxe combináu pa conocer la situación de los vuelos y servicios que contrataren. Asina, recuerda qu'en casu de cancelación los pasaxeros tienen dellos derechos.

En primer llugar, pue escoyer énte la devolución del costu íntegru del billete o que-y faciliten un tresporte alternativu hasta’l destín final. Tamién pue pidir una compensación d’ente 250 y 600 euros por persona a tenor de la distancia a percorrer, nun siendo que la compañía informare de la cancelación con una antelación de dos selmanes o ésta seya por circunstancies estraordinaries, como’l mal tiempu. Por último, tien derechu a que la compañía-y facilite asistencia hasta la salida del avión. Nel casu de nun facelu, debiera guardar los xustificantes de los gastos –hotel, comida, etc.– pa solicitar el reembolsu.

Nel casu de trés hores o más de retrasu, cuando’l vuelu tenga como orixe o destín cualquier aeropuertu de la Xunión Europea, el pasaxeru tamién tien derechu a recibir la mesma compensación económica que si se tratare d’un vuelu canceláu. Les persones afeutaes por estos problemes tendrán que dirixir la reclamación a la compañía aérea y, si nel plazu d’un mes nun satisfái la mesma, van poder presentar una denuncia ante l’Axencia Estatal de Seguranza Aérea, allugada na Avenida Xeneral Perón, 40, en Madrid.

Si la compañía persiste en nun atender la reclamación al traviés d’estos procedimientos, l’usuariu pue recurrir a la vía xudicial pa facer efeutiva la indemnización, énte’l xulgáu de lo mercantil que correspuenda. Nesti casu, tendrá de presentar una reclamación nel formulariu previstu pa ello, ensin falta de cuntar con un abogáu o procurador por tratase d’una cantidá inferior a 2.000 euros.

Pa más información sobre los derechos de los pasaxeros d'avión na Xunión Europea, Consumu remite a esta web.