Consumu recomienda a los afeutaos poles cláusules suelu qu’esixan per escrito la devolución de les perres

El Tribunal de Xusticia de la Xunión Europea (TXXE) dictó recién una sentencia qu’obliga a les entidaes bancaries a devolver toles perres que cobraron de más n’hipoteques pola denominada cláusula suelu. L'Axencia de Sanidá Ambiental y Consumu recomienda a los afeutaos a esixir per escrito la devolución del dineru.

L'organismu, dependiente de la Conseyería de Sanidá, sorraya qu'ésta ye la midida más direuta pa recuperar les cantidaes inxustamente percibíes polos bancos, desque'l TSXX declaró que les entidaes han de devolver tolo ingresao por esta disposición de les hipoteques, ensin llende temporal dalguna. Nel casu de que se refugara esti pidimientu o nun llograra se respuesta nel plazu de dos meses, el consumidor tendrá d'asesorase y acudir a la vía xudicial pa llograr la devolución, vía ésta que ye la que pretenden forciar los bancos pa frenar el procesu.

L'axencia recuerda que nos años últimos les entidaes bancaries vinieron incluyendo nos contratos de préstamu hipotecariu la cláusula suelu que, al afitar un tipu mínimu d'interés, torga al consumidor beneficiase de les baxaes del tipu de referencia usáu na hipoteca, xeneralmente l’Euribor. El Tribunal Supremu considerara, na so sentencia del 13 de mayu del 2013, qu'estes disposiciones yeren abusives por falta de tresparencia cuando la entidá bancaria nun facilitara al cliente la información necesaria pa que tuviera una conocencia perfecta de la so trescendencia económica, pero llendó la devolución de les cantidaes percibíes indebidamente a la fecha de la sentencia.

Esta sentencia foi cuestionada por dellos xulgaos del Estáu, que plantegaron una cuestión prexudicial al TXXE pa que manifestara si esa llende temporal yera compatible cola normativa comunitaria de proteición de los consumidores. La publicada ayeri, mentes, considera qu'esa llende temporal ye contraria al derechu de la Xunión Europea y que “la declaración xudicial del calter abusivu d'una cláusula ha tener como consecuencia’l restablecimientu de la situación na que s'atoparía'l consumidor de nun esistir dicha cláusula”.

Esto supón que cuando s'anule xudicialmente una cláusula suelu, les entidaes bancaries van tener que restituyir “les ventayes llograes indebidamente en desterciu del consumidor” y devolver la totalidá de les cantidaes percibíes pola so aplicación. Pa más información, los consumidores pueden dirixise a l'Axencia de Sanidá Ambiental y Consumu, a les oficines municipales d'información al consumidor y a les asociaciones de consumidores.

El serviciu de Consumu lleva años requiriendo a les entidaes bancaries qu'esanicien eses condiciones de les hipoteques. Amás, la mediación de l'axencia llogró la retirada de más de 1.245 cláusules suelu y la devolución a los afectaos de les cantidaes indebidamente abonaes, como resultáu d'una midida de proteición de los derechos de los consumidores que solo aplicó'l Gobiernu y que se desenvuelve dende xunetu del 2013, depués de la sentencia del Tribunal Supremu que consideró abusives estes cláusules.