Constituyida la Xunta Asesora de Toponimia

La Conseyería d’Educación y Cultura aspira a completar la recuperación toponímica d’Asturies nesta llexislatura. La revisión de los nomes de llugar d’Uviéu podría tar finada nel primer trimestre del 2016.

53 son los conceyos asturianos que cuenten cola toponimia tradicional aprobada, procesu que s’anició hai once años ensin una repercusión real pola pasividá de les alministraciones, que continúen en munchos casos utilizando los nome de llugar castellanos, derogaos. Nesti tiempu recuperáronse en total 16.565 topónimos.

En total queden 25 conceyos por oficializar los sos nomes de villes y aldees tradicionales, tando anguaño 17 col procesu en trámite. La intención de la Conseyería d’Educación y Cultura ye’l de completar el mapa toponímicu d’Asturies “nesta llexislatura”.

Fernando Padilla, direutor general de Planificación Llingüística y Normalización, ocupa la presidencia de la Xunta Asesora de Toponimia, mientres que la vicepresidencia ye pal direutor xeneral d’Ordenación del Territoriu y Urbanismu, Juan José Fernández Pereiro. Completen l’organismu como vocales Ricardo Suárez Argüelles, direutor xeneral d’Alministración Llocal; Ramón d’Andrés, representante de la Universidá d’Uviéu; Ana María Cano, representante de l’Academia de la Llingua Asturiana; y José Antonio Álvarez Castrillón, representante del Real Instituto de Estudios Asturianos (RIDEA).

Tamién formen parte d’ella dellos espertos nomaos pola conseyería, en concreto, María Paz Fonticiella, profesora y especialista en toponimia asturiana, y José Alba, profesor titular d’Economía Aplicada de la Universidá d’Uviéu y espertu n’estudios xurídico-sociales sobre territoriu y desarrollu sostenible. La xefa del serviciu de Planificación Llingüística y Normalización, Sandra González Tejón, va actuar como secretaria.

El decretu más esperáu

El decretu de toponimia d’Uviéu, pol fechu simbólicu de ser la capital del país y la segunda población n’habitantes, ye ún de los más esperaos. Tres años de retrasu, paez que’l procesu de recuperación da un emburrión y que podría tar rematáu nel primer trimestre del añu qu’entra. Asina lo confirmaron los asistentes al alcuentru que tuvo Padilla con representes del Conceyu d’Uviéu, cola presencia del edil de Cultura Roberto Sánchez Ramos ‘Rivi’.

Na reunión tamién se trató la posibilidá de qu’Uviéu cuente próximamente con un Serviciu de Normalización Llingüística y l’entamu de campañes de promoción del idioma.