El Conseyu Escolar Estatal da’l preste a la especialidá de Llingua Asturiana

La tan demandada especialidá de Llingua Asturiana da un pasu más hacia la so creación. El Conseyu Escolar Estatal, nel que ta representada tola comunidá educativa, dio’l so preste a esti avance, lo que significa un sofitu perimportante de cara a l’aprobación definitiva por parte del ministeriu.

Beatriz Quirós, del Sindicatu Unitariu Autónomu de Trabayadores del Enseñu d’Asturies (Suatea), defendió esta propuesta ayeri dientro de les enmiendes y meyores al informe añal sobre’l cursu presentáu por STEs-Intersindical nel muérganu, recibiendo 34 votos a favor por 26 en contra y 6 astenciones. D’esta manera, el Conseyu Escolar Estatal recomienda al Ministeriu d’Educación “la creación inmediata de la especialidá de Llingua Asturiana, pa poner en pie d’igualdá al alumnáu de la nuesa comunidá autónoma y al profesoráu que pon Llingua Asturiana y Gallego-asturiano nel su ámbitu, col restu de llingües propies u oficiales del Estáu”, apunten dende Suatea. Hai que recordar qu’Ana González, conseyera d’Educación, Cultura y Deporte, prometiera pa esta llexislatura esta reclamación vieya del asturianismu que permitiría la convocatoria d’oposiciones a maestros y finaría cola precariedá llaboral del profesoráu, amás d’ufrir una estabilidá mayor pa los escolinos de Llingua Asturiana y Gallego-asturiano.

Otres de les iniciatives que defendió con ésitu Suatea na reunión celebrada ayeri en Madrid “tien que ver cola necesidá d’implantar nel ámbitu educativu un plan de choque contra la violencia de xéneru, faciendo dende’l Ministeriu d’Educación un esfuerciu presupuestariu pa desendolcar programes de coeducación nos centros, asina como la puesta en marcha nes distintes alministraciones educatives de formación específica, tanto inicial como permanente, pa tol profesoráu en rellación cola prevención de la violencia contra les muyeres”.