Conmemórense los cien años de la Llei de Parques

Con un actu nel Centru de Visitantes Pedro Pidal de los Llagos de Cuadonga.

María Jesús Álvarez, conseyera de Desarrollu Rural y Recursos Naturales, presidió l'actu que conmemora l'aprobación de la Llei de 'Parques Nacionales' en Madrid que permitió la creación del 'Parque Nacional de la Montaña de Covadonga'. Foi'l 7 d'avientu del 1916, anque la celebración adelantóse esta mañana con un actu que consistió nuna intervención de la conseyera, una visita guiada al Centru de Visitantes Pedro Pidal y el descubrimientu d'una placa que recuerda esti centenariu. Al mesmu acudieron dellos descendientes de Pidal, principal impulsor de la creación de los Parques Nacionales.

"Recordamos l'esfuerciu que lideró un asturianu, el Marqués de Villaviciosa, un home adelantáu al so tiempu, que supo ver la importancia de conservación d'espacios qu'atesoren valores naturales mui importantes", destacó Álvarez, que tamién quixo tener un recuerdo con "tolos que mientres estos cien años desendolcaron la so vida equí, nesti espaciu de monte; toos aquellos que viven y trabayen de la ganadería, o que rexenten queseríes o que s'incorpararon a actividaes económiques nueves venceyaes al espaciu públicu, al turismu o al deporte de monte. Un homenaxe a los que trabayen como funcionarios del Parque, a los que formen parte de les brigaes de rescate y, por supuesto, a los pastores de Picos".

Quince espacios protexíos baxo esta norma

La conmemoración d'esti centenariu celebróse de manera simultánea nos quince parques que conformen esta rede d'espacios protexíos y na propia sede del Ministeruo d'Agricultura, Pesca, Alimentación y Medio Ambiente. La Llei de Parques tramitóse a iniciativa del senador asturianu Pidal, qu'actuó de ponente de dichu testu llegal nes Cortes.

Esta norma foi la primer del mundu con esti rangu y la so promulgación supunxo la posibilidá d'instituir esta figura de proteición, que tuvo'l so primer avance nel 1918 cola creación de la 'Montaña de Covadonga' como 'Parque Nacional'.