Conmemórense los 800 años del aniciu de la construcción del monasteriu de Valdediós

El 18 de mayu del 1218 ye la fecha conocida del comienzu de los trabayos, efeméride que se va recordar con dos actividaes nel salón d'actos del propiu edificiu monásticu.

La primera d'elles va tener llugar esta mesma tarde y ta entamada por Cubera, el Real Instituto de Estudios Asturianos (RIDEA), el Conceyu de Villaviciosa y Carmelitas Samaritanas. A les 18 hores Andrés Martínez Vega, subdireutor del RIDEA y especialista n'historia medieval, va falar de 'La función de los monasterios medievales en la ordenación del territorio y la población. El Císter en ese contexto'.

Tres esta conferencia, Agustín Hevia, direutor del Archivo Histórico Diocesano, va esplicar 'La disposición y distribución interna de los monasterios medievales' al traviés d'un percorríu pol conxuntu monásticu de Valdediós. Pa l'asistencia a esta xornada, l'Ayuntamientu pon a disposición de la xente interesao un autocar de baldre que va salir a les 17.30 hores del Atenéu Obreru de Villaviciosa.

Conxuntu cisterciense

Mañana va ser l'Asociación de Profesionales Independientes de la Arqueología de Asturias (APIAA) y l'Asociación ASTA la que va conmemorar esta efeméride con una xornada nel monasteriu, na que collaboren la Fundación José Cardín Fernández y Carmelitas Samaritanas, col oxetivu de destacar el papel de Valdedios na historia monástica y arquiteutónica d'Asturies. A les 11 hores van principiar les actividaes con un actu nel que van intervenir Otilia Requejo, direutora xeneral de Patrimoniu Cultural; la Madre Olga María, priora del monasteriu; Fructuoso Díaz García, presidente d'APIAA; y Gonzalo González Espina, presidente d'ASTA y ex direutor de la Escuela Talle de Valdediós.

A les 11.30 hores va celebrase una conferencia centrada nos problemes que se tuvieron qu'afrontar mientres los trabayos de restauración del complexu realizaos por una escuela taller promovida pol Gobiernu na década de los 90, na que van participar l'inxenieru y arquiteutu Jerónimo Lozano; Santos Sánchez García, coordinador de Práutiques d'Oficios de la Escuela Taller de Valdediós; y Beatriz Abella, restauradora de la escuela taller. Darréu Díaz García va esplicar cómo s'inxerta esti monasteriu nel contestu d'estas fundaciones nel país, onde representa ún de los principales conxuntos cistercienses, pa siguir con un  análisis del sentíu del ritu de consagración del templu de Valdediós a cargu de César García de Castro, arqueólogu del Muséu Arqueolóxicu d'Asturies. 

La siguiente actividá, prevista pa les 13 hores, va consistir nuna charra sobre la Escuela Taller de Valdediós protagonizada polos sos direutores ente 1986 y 1998, esto ye, González Espina, Emilio Suárez Pérez y Marcelino Barbés. Una visita guiada al claustru y la ilesia de Santa María de Valdediós y un conciertu d'órganu d'Emilio Huerta van poner el ramu a la xornada.

Dende la organización recuerden la necesidá d'acutar plaza pa l'asistencia al mesmu, por cuestiones d'aforu, al traviés del Facebook d'ASTA o APIAA.

Xunto a San Salvador

El monasteriu de Santa María de Valdediós fundóse nel añu 1200 por mediación de los reis Alfonso IX de Lleón y Berenguela de Castilla tres ceder el valle nel que s'asitia a la Orde del Císter. La construcción del edificiu, d'estilu románicu, comenzaría na fecha yá citada del 1218, nun enclave xunto a la ilesia de San Salvador de Valdediós, ún de los meyores exemplos del prerrománicu asturianu.

Esti templu, conocíu tamién como El Conventín, construyóse baxo reináu d'Alfonso III nel 892.