Confírmase la ‘Cultura Sidrera Asturiana’ como candidata estatal a Patrimoniu Cultural Inmaterial nel 2023

La ‘Cultura Sidrera Asturiana’, como s’esperaba, va repetir como candidata oficial d’España énte la UNESCO como Patrimoniu Cultural Inmaterial. Esti añu foi una de les que quedó fuera d’evaluación pola preferencia cola que cuenten los estaos con menos elementos reconocíos, pero nel 2023 asegura’l pase del corte.

La confirmación llegó ayeri na xunta semestral del Conseyu del Patrimoniu Históricu, que tuvo llugar en Zaragoza, a propuesta de Pablo Léon, direutor xeneral de Cultura y Patrimoniu, en representación del Gobiernu d’Asturies. El procedimientu esixe repetir designación pa poder acceder a la evaluación que se va confirmar en marzu del 2023.

Y ye que la candidatura asturiana tien esti pasu aseguráu, yá que cada estáu tien derechu a qu’ún de los sos espediente s’analice cada dos ciclos. Asina, la propuesta por España entraría l’añu viniente cola posibilidá de pasar a formar parte de la Llista del Patrimoniu Cultural Inmateria, lo que se confirmaría, nel casu de cumplir toles esixencies de los espertos del Organización de las Naciones Xuníes pa la Educación, la Ciencia y la Cultura (UNESCO), en payares o avientu del 2024, cuando aconceye’l Comité Intergubernamental de Salvaguarda del Patrimoniu Inmaterial.

La xota, la próxima

El Conseyu del Patrimoniu Históricu tamién decidió nel aconceyamientu celebráu na sede de la Deputación Cheneral d'Aragón, col apoyu de 15 autonomíes, la futura declaración de la xota como Manifestación Representativa del Patrimoniu Cultural Inmaterial. Ye un requisitu necesariu pa qu'esti elementu pueda ser el candidatu próximu del Estáu a Patrimoniu Cultural Inmaterial, yá nel 2024.

"La xota, anguaño, configúrase como'l xéneru tradicional más estendíu, diversu, dinamizáu y reinterpretáu de tolos xéneros tradicionales que componen el variáu mapa sonoru y musical d'España", apunten.

Na imaxe, un momentu del Conseyu del Patrimoniu Históricu d'ayeri. Semeya propuedá del Gubierno d'Aragón.