Confirmaos 37 casos de COVID-19 esti llunes

La tasa de positividá diaria quedó nun 2,35 por cientu nuna xornada ensin finaos.

A falta de la espublización de los datos oficiales de la COVID-19, la Conseyería de Salú confirmó 37 casos nuevos detectaos ayeri –l'actualización suma 2 más por contaxos non contabilizaos en díes previos–. Son 16 menos que'l domingu, cuando se rexistraron 53.

El Serviciu de Salú del Principáu d'Asturies (SESPA) fixo 2.728 pruebes de diagnósticu d'infeición activa, polo que la tasa de positividá s'asitió nel 2,35 por cientu, pol 3,35 por cientu de la xornada anterior con 1.937 tests realizaos. A 7 díes esti porcentaba taba enantes de l'actualización nun 2,54 por cientu –ayeri baxó al 2,38 por cientu–.

Per tercer xornada nun se rexistró muerte nenguna cola enfermedá causada pol coronavirus SARS-CoV-2. Dende qu'entamó l'andanciu'l la cifra de persones finaes asítase en 1.974.

Hai 64 hospitalizaos en planta con confirmación o sospecha de COVID-19, 13 menos qu'ayeri, mentes que na UCI siguen 31 pacientes.

Na semeya, vacunación ayeri a persones del 1972 y 1973 n'El Molinón, que sustitúi al Palaciu de Deportes como centru de puesta de preparaos en Xixón.