Conferencia sobre l'arquitectura prerrománica nes cróniques del Reinu d'Asturies

|

La Conseyería de Cultura programa nel Arqueolóxicu una conferencia sobre l'arquitectura prerrománica nes cróniques del Reinu d'Asturies. El muséu acueye tamién una muestra sobre la evolución del paisaxe urbano y natural qu'arrodia estos monumentos.

Fernando Marín Valdés, profesor d'Hestoria del Arte na Universidá d'Uviéu, va ufiertar mañana, xueves, a les 19:30 hores nel Muséu Arqueolóxicu, la conferencia «Presencia de la arquitectura prerrománica en las crónicas del Reino de Asturias». La charra ta enmarcada nel ciclu de conferencies programáu pola Conseyería d'Educación y Cultura, cola collaboración de la Universidá d'Uviéu, que forma parte de los actos conmemorativos del 30 aniversariu de la inclusión del prerrománicu asturianu na llista del patrimoniu mundial de la Unesco.

Les siguientes cites d'esti ciclu son el 28 de xineru, "Morir en la época del Reino de Asturias: arqueología funeraria", por Alejandro García Álvarez-BustO, de la Universidá d'Uviéu; y el 4 de febreru. "Vivir en la época del Reino de Asturias: casas, aldeas y cultura material", por Juan Antonio Quirós Castillo, de la Universidá del País Vascu.

Tamién nel Muséu Arqueolóxicu, sede del ciclu de conferencies, ta abierta una esposición qu'amuesa la evolución del paisaxe urbano y natural qu'arrodia a les xoyes prerromániques. L'amuesa incluye paneles con testos, fotografíes y planimetríes de Santa María de Naranco, San Miguel de Lliño, Santa Cristina de L.lena, Santullano de los Praos, la Cámara Santa de la catedral d'Uviéu y la Foncalada, toos ellos incluyíos nel llistáu de la Unesco, amás de San Salvador de Valdediós, monumentu sobre'l que se tán realizando na actualidá les xestiones pa la so inclusión na llista.

Contador Estadistiques