Confírmase la operación urbanística tres de los despidos d’El Comercio

El colectivu de trabayadores d’El Comercio dio nueves informaciones sobre les intenciones que’l diariu xixonés tien tres de los despidos de 29 trabayadores. Cuatro torres de pisos y oficines son parte de la operación urbanística.

El pasáu mes d’ochobre’l Grupu Vocento, propietariu d’El Comercio, anunció la intención de desendolcar un ERE qu’afectaría “de mou inminente” a 29 trabayadores. L’oxetivu de la empresa ye treslladar la rotativa de Xixón a Benavente (Zamora).

L’Asociación de la Prensa d’Uviéu y el colectivu de trabayadores d’El Comercio yá falara d’especulación urbanística tres d’esta operación, daqué qu’agora confirmen en nota de prensa: “Nos terrenos d’El Comercio se llevantarán cuatro torres de selectos pisos y oficines, con una altura que pue algamar les doce plantes, según recueye’l nuevu plan urbanísticu de la ciudá”.

Los trabayadores denuncien la estratexa del director financieru del diariu xixonés, Goyo Ezama Meabe, y del director xeneral, Julio Maese Guisasola, de presentar un ERE “namás que cuatro díes dempués de que se zarrara’l plazu de presentación d’allegaciones al Plan Xeneral d’Ordenación (PXO) que da lluz verde al proyectu”.

“Los señores Ezama y Maese burlláronse de non poques persones y instituciones, yá que p’algamar la recalificación urbanística comprometiéronse a caltener na zona tolos recursos de la empresa”, denuncien los trabayadores en critiques a que se mande la rotativa a Benavente (Zamora).

Beneficios económicos pa Madrid
El comunicáu de los trabayadores tamién ataca a los xestores d’El Comercio polos despidos cuando esti periódicu tuvo 600.000 euros de beneficios en 2009; pesllará 2010 con otru tantu y la previsión de 2011 ye de 500.00 euros. Amás señalen que los beneficios pola venta del solar actual del periódicu van ser de diez millones d’euros.

“Con eses perres podría recapitalizase’l periódicu y media ciudá. Pero van unviar discretamente’l botín a Madrid p’ayudar a tapar el pufu millonariu del diariu ABC y a Bilbao pa repartir dividendos nel Grupu Vocento”, sorrayen los trabayadores.

Con perspectives de futuru más optimistes, el colectivu añadió que “nun paez qu’estos dos personaxes (los directores financieros) lo vayan a tener fácil pa que la Conseyería de Trabayu del Principáu apruebe-yos esi malintencionáu ERE, sabiendo lo que tamos sabiendo y faciendo saber lo que tamos faciendo saber”.