Concursu de microrrellatos n’asturianu n’Avilés

Con motivu de les Fiestes de San Roque del Carbayeo, a facer n'Avilés del 17 al 20 d'agostu del 2007, y col aquel d'animar a la creación lliteraria en llingua asturiana, l'Asociación de Vecinos "El Hórreo del Carbayedo" en collaboración cola Estaya de Normalización Llingüística del Ayuntamientu d'Avilés, convoca'l Primer "Concursu de Microrrelatos" de l'Asociación. El certame ta abiertu a cualisquier escritor/a en llingua asturiana con un máximu de tres rellatos de máximu de 500 pallabres con temática libre.

El plazu de presentación d'orixinales va tar abiertu hasta'l 6 d'agostu, pudiendo unviase pel Corréu Postal a la AAVV. "El Hórreo" na Cai Dr. Marañón, 16, baxu 33402 d'Avilés o per corréu electrónicu a avvelhorreo@yahoo.es. Encamiéntase que les señes del e-mail nun sían indicatives de l'autoría de los rellatos y, lo mesmo que los que vayan en sobre de papel, han firmase con nomatu. Casu de ser premiaos, los rellatos que se manden per e-mail nun precisen de mandar aparte los datos personales del autor, comprometiéndose la organización a retrucar al mail del agraciáu. Casu de dir en sobre de papel, los rellatos han mandase per triplicao, nun importando nin la tipografía nin el tamañu la lletra, siempre que seya lleíble. Los datos reales del autor han dir aparte.

El primer premiu acuta 300 € pal meyor rellatu y 3 premios consistentes en lotes de llibros valoraos en 100 € pa los tres finalistes. El fallu va facelu'l 10 d'agostu un xuráu compuestu por reconocíes personalidaes de la cultura asturiana, y el llunes 20 d'agostu, los cuentos ganadores van lleelos contadores profesionales o los mesmos autores nel campu la fiesta del parque del Carbayeo a les 20:00 hores. Los microrrellatos ganadores y finalistes van pasase a gran formatu y esponese nos chigres del barriu pa públicu conocimientu y promoción de los autores.