Concursu de cómica na Comarca la Sidra

La Mancomunidá Comarca de la Sidra, na que s'inxeren los conceyos de Bimenes, Cabranes, Colunga, Nava, Sariegu y Villaviciosa, per aciu de los sos servicios de Mocedá y Normalización Llingüística convoca una nueva edición del Concursu de Cómic N'asturianu. Ye esta la quinta edición del certame, que s'afita dientro d'esti tipu de convocatories. El concursu inxértase dientro'l programa de promoción artística CREACIÓN y d'una manera tresversal en Programa de Normalización del usu del Asturianu de la Mancomunidá de la Comarca la Sidra empobináu a la mocedá, al ser el cómic una espresión artística cercana al llector mozu.

Depués de les cuatro ediciones anteriores onde se vieron trabayos de calidá estraordinario, la convocatoria d'esti añu respuende a los mesmos criterios: escritos n'asturianu, temática llibre, autores mayores de 14 años de cualesquier orixe y unos premios que van de los 200 euros de los dos accésit al premiu primeru de 500 euros, amás del espublizamientu de les meyores historietes presentaes.

El concursu incluye una categoría paralela d'ellaboración de Tires Cómiques empobinada a escolinos/es d'enseñanza primaria y secundaria de los distintos centros educativos de la Comarca de la Sidra, onde los participantes tienen d'ellaborar una tira con una estensión máxima de cinco viñetes. Nesti casu los premios van ser de material didáuticu, deportivu y d'esparcimientu pa los tres meyores trabayos de les distintes modalidaes educatives.

El plazu de presentación de los trabayos tanto na categoría de Cómic pa mayores de 14 años, como la de Tires Cómiques pa escolinos/es, acaba'l 15 de payares, y, como ye vezu, toles obres presentaes van formar parte d'una esposición itinerante pelos diferentes centros culturales de la Comarca de la Sidra, asina como per dellos espacios culturales asturianos.

los trabayos han unviase al Serviciu de Normalización Llingüística de la Mancomunidá de la Comarca de la Sidra na Cai Escueles de Paraes, n u 47 - 33529 Nava, o a les Oficines d'Información Xuvenil de la Comarca, Cai La Laguna, baxos 33520 - Nava y Centru Cultural "San Juan de Capistrano" C/ Asturies 22, 33300 Villaviciosa.