Conclusiones del alcuentru de Cangas

Los escritores y estudiosos participantes nel I Alcuentru d'Escritores n'Asturianu Occidental, que se celebró esti fin de selmana en Cangas del Narcea, asoleyaron unes conclusiones nes que sorrayen la xunidá del idioma asturianu y piden un reconocimientu llegal que torgue'l procesu de desapaición de la llingua.

Nel so primer puntu, les conclusiones falen de la situación social minorizada y recesiva, de billingüismu desequilibráu que vive l'asturianu, que namás pue iguase cola reconocencia de la oficialidá, anque yá se señala que ello nun ye abondo, esixendo'l puntu 2 una política radical de normalización social, que llegue a toles estayes (educación, medios de comunicación ec) sorrayando enforma'l papel de los conceyos nesti procesu. Nel puntu terceru reconozse'l papel de la lliteratura como elementu de dignificación del idioma y especifícase que la variante occidental del asturianu tien que recibir una atención y un precuru particulares.

Pa rematar, les conclusiones afalen la unidá del idioma ensin prescindir de particularidá nenguna, reconociendo'l llabor lliterariu como un instrumentu pa siguir afondando na "xuntura l.lingüística y cultural de tolas tierras que falamos esta l.lingua, ya dar rinxu a los vínculos humanos que tán na raíz más fonda d'esa unidá". D'otra manera esta afirmación de voluntá d'unidá llingüística "tien qu'entendese tanto en relación colas variantes central ya oriental de la l.lingua cumo colas falas que s'estienden, al sur d'Asturias, por L.lión, Zamora ya Miranda del Douru".

Un últimu puntu de les conclusiones fai un pidimientu a l'Academia de la L.lingua Asturiana como única entidá con responsabilidá oficial na normativización de la llingua a completar les midíes normatives específiques yá presentes en parte nes Normes Ortográfiques que precisa la variedá occidental del idioma. Nesti sentíu la resolución diz que "Los escritores ya las escritoras occidentales precisamos un conxuntu de mididas ortográficas unitariu en relación col restu del idioma, qu'evite aspectos negativos cumo la improvisación, la esperimentación contina ou los posibles retrocesos normativos, ya qu'integre de manera natural la variante occidental no procesu de normalización de la nuesa l.lingua"