Conciertos y actividaes en "Llanes al cubo"

El Conceyu Llanes entama esti fin des selmana toa una riestra de conciertos, actuaciones de teatru, charres...etc, too ello nel programa "Llanes al cubo".Les actividaes son tantes que vamos informavos de les direutamente rellacionaes cola música, el restu de presentaciones de llibros, proyeciones de cortos, teatru y charres podéis consultales na nuestra guia d'ociu. La música entama'l vienres día 15 con Anabel Santiago, va actuar na Basílica de Llanes presentando'l so nuevu discu "Al son de la Lluna". Esti ye discu, del que lleva falándose abondo tiempu, ye una propuesta arriesgada nel mundu la tonada, programaciones, curdiones, cuerdes, vigulinos y la voz d'Anabel son l'apuesta d'esti discu del que falarémosvos nesta sección d'equí a poco. Pela nueche a les 22:00 nel escenariu principal de "La Bombilla" primer gran conciertu, "Macfeck" músicos qu'anque viven en Galicia son de diferentes llugares colo que'l so folk ye una suma de distintes influencies. Depués actuen "Corquiéu" y "Wolfstone" que ya tuvieron compartiendo escenariu esti añu en Mieres na "Folixa na Primavera".El sábadu actuaciones d'instrumentistes a les 13:00 hores y a les 20:00 hores na "Bombilla", y la presentación del anuariu de la música de "L'Aguañaz" na casa cultura a les 20:00 hores. Na Basílica actuación del colectivu "Muyeres " col so "Pasamentu" a les 20:30. Depués, a les 21:00, vuelta a la "Bombilla" pa ver a los "Gatos del Fornu" que ya tan pa entrar nel estudiu y grabar el so primer discu en solitariu. A eso de les 22:00 el segundu de los conciertos principales cola banda de gaites "Llacín", qu'echará unes pieces del so discu "Tornallás", "Niundes" grupu que podemos escuchar nel "Nuevu Folk Asturianu IV" de "L'Aguañaz" y que sigui l'estilu de grupos como "Corquiéu", pa rematar la nueche "Llan de Cubel" y "Shooglenifty", los escoceses de sobra conocíos polos aficionaos al folk y que vienen con dalgunos cambios na so formación anque de xuro ensin baxar el nivel que siempre tuvieron.Amás de too esto va haber una "Feria de Luthiers" y una "Feria del llibru y del discu asturianos" que tarán puestes nel recintu "La Bombilla" hasta'l domingu.