Conceyu sofita la concentración pa rememorar el 25 de mayu baxo la etiqueta #AsturiesResiste

Conceyu Abiertu sofita la concentración énte la Xunta Xeneral pa reivindicar el 25 de mayu convocada esti sábadu baxo la etiqueta #AsturiesResiste. La plataforma d’eleutores denuncia l’escaezu institucional d’esta fecha.  

Esti sábadu cúmplense 205 años dende que nel 1808 la Xunta Xeneral proclamase la so soberanía y la población se llevantara n’armes contra Napoleón cola formación del ‘Exércitu Defensivu Asturiano’, momentu nel que tamién se creó la bandera cola cruz de la victoria y el lema ‘Asturias xamás vencida’, xerme de l’actual. Ésti ye ún de los fechos más importantes de nuesa historia y un episodiu de rebeldía escaecíu poles instituciones que, según Conceyu Abiertu, ye “un espeyu nel que miranos güei’.

Los nacionalistes consideren que nestos tiempos ye necesaria una tresformación económica, política y social fonda, y reivindiquen la soberanía como un mediu imprescindible para facelo. “L’Estáu español, col so calter ‘indisoluble’ que-y otorga una constitución apautada al calor del franquismu, ñega un derechu democráticu básicu, como ye’l derechu a decidir de los pueblos. Sicasí, dende’l pueblu asturianu ye imprescindible vindicar esti derechu, asina como la soberanía como fueya de ruta pa recuperar la dignidá perdida y construyir un modelu protagonizáu pol pueblu trabayador na gueta de la xusticia social y la dignidá pa la nuesa cultura ya identidá”, afirmen dende Conceyu Abiertu.

La plataforma d’eleutores llama a participar na concentración xunitaria d’esti sábadu, convocada a les 13 horas baxo la etiqueta #AsturiesResiste pa “rememorar y vindicar los valores de rebeldía, soberanía y dignidá del pueblo asturianu” y denunciar “l’escaezu y maltratu institucional que sufre esta fecha y los sos fechos por parte del Gobiernu asturianu”.