Conceyu Abiertu va celebrar el Día de la Nación Asturiana en L’Entregu

El parque La Llaguna de L’Entregu ye’l llugar escoyíu por Conceyu Abiertu pa celebrar el Día de la Nación Asturiana. Dellos representantes de la formación nacionalista van intervenir nun actu políticu, al que va siguir una xinta popular.

Conceyu Abiertu, qu'esti añu nun va entamar manifestación, considera que “l’ocho de setiembre, agora más que nunca, tien que ser un día de vindicación, un día pa vindicar la figura de los conceyos asturianos na reconstrucción nacional y social del nuesu país y la gueta de la soberanía y de la plena democracia p’Asturies”, pa depués añadir que’l fechu de que’l “Gobiernu d’Asturies organize una fiesta en Cangues y vaiga a misa a Cuadonga sirvirá como entretenimientu o distraición, pero nun mos sirve pa nada políticamente a los asturianos”. “L’ochu setiembre ye un día pa recordar qu’Asturies ye una nación y que como tal tien unos drechos. Tenemos que criticar necesariamente al Gobiernu asturianu nel día de tolos y toles asturianes porque escaez facer lo más importante: tien que reivindicar políticamente Asturies y les sos instituciones, que s’atopen baxo amenaza del centralismu español; tien que recordar que somos una nación hestórica europea, que tenemos drechu al autodetermín y que nestos momentos d’imposiciones, de recortes, d’ataques a la yá de por sí curtia autonomía que tenemos, d’amenaces a los conceyos y mancomunidaes y de desaniciu de lo público, ye precisamente cuando con más puxu tenemos que desixir al gobiernu d’Asturies qu’actúe como tal; que dexe de ser cómpliz y que mos defienda”, añaden dende la plataforma d’eleutores.

D’igual forma, critiquen l’actitú del Executivu de Javier Fernández énte l’amenaza d’intervención que fixo’l Gobiernu estatal y énte los recortes que ta imponiendo Mariano Rajoy de “forma illegal, atentando contra la so propia constitución española”; unos retayos que consideren “inasumibles” y que “ponen en riesgu el sistema públicu de sanidá y educación, sobre los que tenemos competencies”. “Eses amenaces necesiten rempuesta y Conceyu Abiertu ta encadarmándose pa organizar una rempuesta. Poro, animamos a tolos asturianos y asturianes esmolecíos pol futuru del so país a igualu con nosotros en clave social. Un bon entamu puede ser compartiendo con nós en L’Entregu (Samartín del Rei Aureliu) esti 8 de setiembre próximu, Día de la Nación Asturiana”, aseguren dende Conceyu Abiertu.

L’actu políticu va principiar a les 14 hores y nél va intervenir Pablo Pérez, conceyal de Conceyu Abiertu por Noreña, amás d’un voceru de la formación a nivel nacional y un representante de Conceyu Abiertu por Samartín y d’otros conceyos. Tres los discursos, va entamase una xinta popular pa tola xente asistente.

Compromisu, en Carreño

Compromisu por Asturies ta estos díes zarrando’l programa de la so celebración del Día de la Nación Asturiana que, si nun hai cambios d’última hora, va tener llugar en Carreño, conceyu onde tien representación nel Ayuntamientu al traviés de la coalición Unidá Nacionalista Asturiana (UNA)-Bloque por Asturies, formaciones impulsores d’esti proyeutu nuevu que pretende axuntar a tol asturianismu. Mentes, Tinéu va ser sede esti añu de les actividaes entamaes por Gobiernu d’Asturies, que, per segundu añu, nun van contar con actuaciones musicales de grupos de sonadía.

Na semeya, un momentu de la manifestación que celebró Conceyu Abiertu n'Uviéu l'añu pasáu pa celebrar el Día de la Nación Asturiana.