Conceyu Abiertu por Samartín y Andecha reclamen la dimisión del alcalde pola polémica de les dietes

|

L’acusación fecha por CC OO del Nalón contra l’alcalde de Samartín, Enrique Fernández, de cobrar dietes pol so desplazamientu a la manifestación pola minería ta llevantando polémica. Conceyu Abiertu y Andecha piden la so dimisión.
 
El sindicatu desvelaba’l vienres que’l primer edil socialista cobró 182,57 euros “en conceptu d’una dieta completa y media dieta de manutención de gastos con motivu de la so asistencia a la manifestación  de los mineros que se celebró’l 11 de xunetu del 2012 en Madrid”, dalgo que, pa Comisiones Obreres (CC OO) del Nalón, “s’alcuentra fuera de cualquier ética política decente, yá que, anque probablemente sía llegal, entendemos que, como representante máximu d’un municipio mineru, debería de tar al altor de les circunstancies amosando la so solidaridá, tal como faen los sos vecinos y vecines, de corazón y non de bolsu”. L’asuntu tratóse en Plenu municipal pola intervención de la conceyala Flor María Alonso (IX) y Fernández defendióse señalando que les dietes se xeneren de manera automática depués cualquier viaxe como alcalde por ser un derechu que tien como complementu del so sueldu y aseguró qu’eses perres nun les diba a cobrar.
 
Estes esplicaciones nun convencen a les formaciones nacionalistes Conceyu Abiertu por Samartín y Andecha Astur, que reclamen la dimisión de Fernández. “Atalantamos que l'actual alcalde de Samartín del Rei Aurelio, Enrique Fernández, debería de pidir perdón públicamente a los nuesos vecinos y dimitir darréu como forma de rectificar de forma honesta”, espresen dende la plataforma d’eleutores, que tamién recuerda otra acusación llanzada por CO OO: el sindicatu tien sospeches de que’l primer edil cobró’l salariu del 18 de xunetu, xornada de fuelga xeneral nes zones mineres, pese a sofitar la convocatoria. “Mentantu los trabayadores faen enzarros baxo tierra nos pozos, prenden barricaes, caminen hasta Madrid o s'arriesguen a vivir multes y represión, estos señoritos del PSOE dicen defender el carbón asturianu pero siempres y cuando enllenen los bolsos propio”, critica Conceyu Abiertu, que considera que “esti fechu vergoñosu y tarrecible ye un claru espeyu de la postura del PSOE respeuto al problema del carbón o cualesquier conflictu social, onde dicen tar de llau del pueblu y los trabayadores, pero siempres tira-yos más la defensa del estáu de les coses, la represión a los movimientos sociales y la corrupción”.
 
Pela so parte, Andecha Astur opina que Fernández “superó llargamente los niveles de baxeza moral permisibles pa cualisquier representante públicu al asignase cerca de 200 euros” en condición de dietes, una situación que “namás ye comprensible dientro’l réxime de corrupción permanente xeneráu pol PSOE n’Asturies, onde l’usu de les instituciones pa beneficiu propiu y de la rede clientelar xenerada a la so alredior costitúi una norma cotidiana”.

Contador Estadistiques