Conceyu Abiertu por Noreña tresllada al PSOE delles propuestes de cara a los presupuestos municipales

|

El PSOE de Noreña púnxose en contautu con Conceyu Abiertu pa conocer la so opinión de cara a la ellaboración de los presupuestos municipales. La formación nacionalista apuesta por “facelos más populares, dinámicos y completos”.

D’esta forma, l’equipu de gobiernu municipal, que cuenta col apoyu d’Independientes de Asturias (Ideas), pretende buscar un consensu nun tema tan importante pal conceyu como l’aprobación de los presupuesto, dalgo que sorprendió a Conceyu Abiertu por Noreña daes les actitúes antidemocrátiques que vien amosando l’alcalde César Movilla na llexislatura, pero que dende la organización nacionalista valoren de manera mui positiva. Sicasí, según señala l’edil Pablo Pérez, lo que’l PSOE pretende ye namái conocer la opinión de la organización nacionalista: “Si se quisiere cuntar con nós de veres, la ellaboración de los mesmos podría facese más democráticamente, teniéndonos en cuenta dende’l principiu y non apurriéndonos un borrador práuticamente peslláu y nel que namás podemos aspirar a introducir pequeños cambeos nun plazu de tiempu percurtiu”.

Conceyu Abiertu treslladó al PSOE un documentu, dividíu en diez puntos, con “cuestiones estratéxiques que consideramos importantes y que se podríen recoyer en partíes concretes pal so desendolcu”. Asina, demanden una democracia participativa; normalización nel usu del asturianu; partíes pa dellos alcuerdos plenarios pendientes; un Plan de Riesgos y Barreres; la reparación d’instalaciones deportives; la señalización de llugares d’interés cultural, natural o turísticu; la edición de material qu’esplique qué ye un Plan Xeneral d’Ordenación Urbana (PXOU) y cómo se pue participar o facer alegaciones; incrementar les perres destinaes a entidaes llocales; impulsar un Llar de la Mocedá; y entamar campañes informatives sobre’l salariu social y la renta universal, la sensibilización ambiental, la promoción del deporte base y del comerciu y la hostelería llocal.

“Estes primeres valoraciones foron treslladaes al equipu gobiernu nes conversaciones que vien calteniendo colos grupos de la oposición. Nuna primer reunión, interesante y bastante productiva, el gobiernu comprometióse a abrir les partíes presupuestaries propuestes pa la democracia participativa y la normalización del asturianu; tamién pa poner la valla onde L’Apeaderu y reducir los riesgos actuales”, espliquen dende Conceyu Abiertu por Noreña, que valora de manera positiva que “l’equipu de gobiernu asuma incluyir estes partíes; sicasí, tamos a la espera d’una rempuesta más concreta sobre’l restu de propuestes”. D’igual forma, los nacionalistes criticaron dellos gastos, que nun-yos cuadraben.

Un conceyu abiertu, el martes

Esti martes, una vegada conocida la respuesta del equipu de gobiernu municipal sobre les propuestes de la organización, va celebrase un conceyu abiertu nel depósitu antiguu d’agua al que tán convidaos tolos vecinos y asociaciones del conceyu. Ésti va principiar a les 20.30 hores y va tratar sobre los presupuestos, cola intención de completar les propuestes y definir la llínea estratéxica de Conceyu Abiertu por Noreña al respeuto.

 

Contador Estadistiques