Conceyu Abiertu por Noreña propón una ordenanza pal usu del asturianu

Pablo Pérez, edil de Conceyu Abiertu por Noreña, propunxo al restu de partíos con representación municipal l’aprobación d’una ordenanza pal usu del asturianu. El documentu ye asemeyáu al aceptáu pol PSOE n’otros conceyos.
 
La intención d’esta formación ye la de reunise en feches próximes colos representantes de los otros seis partíos qu’algamaron representación nes eleiciones del 22 de mayu pasáu, esto ye, PSOE, Independientes por Noreña, PP, Frente de la Izquierda, FAC y Ideas, pa propiciar l’aprobación de la ‘Ordenanza municipal pal usu de la llingua asturiana nel Conceyu de Noreña’. “Sería la primer vez que Noreña se dote d’una norma llocal sobre la llingua propia del conceyu, se reconozan los drechos llingüísticos de tolos vecinos y vecines, se regule l’usu nel ayuntamientu y se pongan en marcha dalgunes midíes de promoción y normalización. Ye por ello que sería preferible aprobalo tolos grupos, siendo amás la llingua patrimoniu de tolos noreñenses independientemente de la so ideoloxía”, afirmen dende Conceyu Abiertu por Noreña, organzación enfotada en sacar alantre la propuesta por unanimidá.
 
Cola entrada d’esta ordenanza, Noreña nun repetiría situaciones desagradables como la protagonizada pol alcalde, el socialista César Movilla, nel mes d’agostu cuando refugó una moción presentada por Pérez por tar presentada na llingua del país. Nesi sen, dende Conceyu Abiertu por Noreña espliquen que’l documentu propuestu axústase “a la llexislación vixente”, “ye asumible por tolos grupos municipales” y nun se diferencia a los esistentes n’otros conceyos asturianos cola aprobación del PSOE. D’igual forma, nun sopondría costu económicu nengún pal Conceyu, “dependiendo gran parte de les actuaciones de la voluntá política”. “Consideramos que l’aprobación de la ordenanza, amás de ser un actu de dignificación de la llingua y cultura asturianes, supón un necesariu avance democráticu. Ye por ello que facemos un llamamientu a toles fuerces polítiques a acabar con una situación predemocrática y a siguir costruyendo una Noreña más democrática”, afirmen los nacionalistes.