Conceyu Abiertu por Noreña llama a la población pa zarrar el so programa eleutoral

Fieles a la filosofía cola que nació’l proyeutu de Conceyu Abiertu, los representantes de la formación en Noreña convoquen a la población del llugar a un aconceyamientu pa zarrar los detalles del programa eleutoral. Ésti va celebrase güei na Casa la Cultura a les 19 hores.
 
L’aconceyamientu ye una continuidá del celebráu nel mesmu llugar el 14 d’abril pasáu, nel que les persones presentes decidieron qu’encabezara la llista de la formación pa l’alcaldía Pablo Pérez. L’oxetivu d’esti alcuentru nuevu ye’l d’aprobar de manera definitiva’l programa base de la candidatura, "ferramienta cola que se quier dar un impulsu a la democracia participativa y direuta y a la tresformación social hacia una Noreña xusta, igualistaria y social, cultural, medioambiental y económicamente caltenible", señalen dende la formación nacionalista.
 
L’asamblea de Conceyu Abiertu por Noreña va principiar a les 19 hores y ta previsto que s’allargue hasta les 21 hores.