Conceyu Abiertu por Mieres solidarízase cola plantiya d’Enferbús polos atrasos que sufre nos pagos

|

La plantiya d’Enferbús, empresa de tresporte de pasaxeros que xune Uviéu con Mieres y Ḷḷena, va reclamar por vía xudicial los atrasos que sufre nos pagos. Conceyu Abiertu por Mieres solidarízase colos 31 trabayadores de la compañía.
 
Enferbús debe a los sos emplegaos los salarios de febreru y marzu, y una paga estraordinaria, y tres reclamar en delles ocasiones a los responsables de la empresa que s’abone la deuda, ensin ésitu, decidieron llevar al xulgáu la so situación. “Dende Conceyu Abiertu por Mieres queremos solidarizanos cola plantilla d’ésta empresa na so llucha por que se cumplan les condiciones llaborales pautaes, les que-yos correspuenden llexítimamente”, señalen dende esta plataforma d’eleutores, que tamién denuncia “la pasividá de les instituciones públiques y organismos como’l Consorciu de Tresportes d’Asturies, que nun actúen énte los abusos empresariales de los dueños d’Enferbús calteniendo les llinies esplotaes pola empresa y, polo tanto, los ingresos, que queden nes manes del empresariu, y nun aporten a los y les trabayadores”.
 
La organización reclama que, nel casu de nun complir coles sos organizaciones, se-y retire la llicencia a Enferbús y qu’otres empreses puedan operar la conexón ente Uviéu y Mieres y Ḷḷena, asumiendo tamién a la totalidá de la plantiya. Otra manera, la formación nacionalista recuerda que la situación de los trabayadores d’Enferbús nun ye única nel conceyu mierense, onde hai empreses pequeñes, medianes y grandes que nun cumplen lo pautao colos trabayadores.
 
En contra de la decisión del zarru de la fábrica de La Vega
 
Conceyu Abiertu por Uviéu fixo públicu un comunicáu nel que muestra la so desconfianza sobre la operación prevista pola multinacional General Dynamics, propietaria de Santa Bárbara Sistemas, pa llevar la producción de La Vega a la fábrica de Trubia, pesllando la primera. La plataforma d’eleutores considera que detrás d’esti movimientu pue haber intereses urbanísticos y tien duldes sobre la capacidá de Trubia p’acoyer a la totalidá de la plantiya que ta trabayando anguaño en La Vega.
 

Contador Estadistiques