Conceyu Abiertu, opción nacionalista nueva

El 19 de febreru va dase a conocer Conceyu Abiertu, candidatura d’unidá popular que va contar col sofitu d’Andecha Astur. La formación nacionalista escueye esta opción tres nun llegar a alcuerdos col Bloque por Asturies y UNA.
 
El Salón d’Actos de la Biblioteca Xovellanos, en Xixón, va acoyer l’actu de presentación d’esti proyeutu novedosu n’Asturies que busca facer país trabayando dende l’ámbitu llocal. Nél, los portavoces d’esta iniciativa van esplicar les carauterístiques d’esta opción nacionalista nueva y los oxetivos colos que naz.
 
Dende les bases de la esquierda nacionalista asturiana naguábase por una candidatura conxunta pa les eleiciones de mayu, pero les negociaciones entes les tres formaciones más representatives nun llegó a bon puertu. Namái’l Bloque por Asturies y Unidá Nacionalista Asturiana algamaron un alcuerdu pa participar xuntos na cita eleutoral.