Conceyu Abiertu decide’l sábadu la so postura énte les Europees

Esti sábadu ta convocáu un Conceyu Nacional de Conceyu Abiertu con un puntu únicu nel orde del día: les Europees del 25 de mayu. El refugu de les CUP a participar nestes eleiciones podría marcar la decisión de la militancia.

Como yá anunció’l coordinador nacional de la plataforma d’eleutores, Mariu Arbesú, tres la celebración del Conceyu Nacional –muérganu asambleariu máximu de la organización–, Conceyu Abiertu namái plantega dos escenarios posibles: nun presentase, dando llibertá a la so militancia p’apoyar a dalguna candidatura, o facelo en coalición con otres fuercies soberanistes d’izquierda. Nesti casu últimu, apostaríase por acudir na candidatura asturiana conxunta que promueve Andecha Astur dientro de la coalición que lidera EH Bildu.

La decisión de nun participar nes eleiciones al Parllamentu Européu del 25 de mayu tomada pol Consell Polític de la Candidatura d’Unitat Popular (CUP) –muérganu máximu d’alderique y decisión política nel que participen representantes de caúna de les territoriales de la organización–, aconceyáu’l domingu tres consultar a les bases al traviés de mediu centenar d’asamblees abiertes celebraes per too Catalunya, podría marcar el Conceyu Nacional de Conceyu Abiertu por mor de les asemeyances ideolóxiques esistentes ente dambes formaciones. Les CUP prentenden con esta postura denunciar “un sistema opacu y antidemocráticu” y quieren centrar los sos esfuercios en siguir puxando pol proyeutu de la xunidá popular. “La Xunión Europea ye un espaciu antidemocráticu qu’impón la privatización de los servicios públicos, la dictadura de la deuda y la preservación de los intereses del capital y de  los estaos”, afirmen los catalanes.

El Conceyu Nacional de Conceyu Abiertu ta convocáu pal sábadu a les 12 hores, en primer convocatoria, y a les 12.15 hores, en segunda, nel Espaciu La Llegra del uviedín CSOA La Madreña. Dende la plataforma d’eleutores conviden a participar a tola militancia y al pueblu asturianu en xeneral.

Movimientos últimos

El refugu de les CUP a participar nes Europees paez que crea duldes nel BNG pa formar parte de coalición que lidera EH Bildu, na que los gallegos contaben cola presencia de los catalanes. El voceru nacional de la formación, Xavier Vence, anunció tres conocer la decisión de les CUP l’entamu  d’un “procesu de reconsideración y reevaluación de la situación".

Mentes, Foro yá confirmó la so participación en solitariu nes eleiciones “con un programa centráu na defensa de los intereses d’Asturies n’España y n’Europa”, según afirmó Francisco Álvarez-Cascos. Les Europees son pal líder de la formación “una oportunidá grande pa sacudise’l sucursalismu que carez Asturies por culpa d’unes fuercies polítiques que deciden en Madrid o en Bruseles ensin tener en cuenta los intereses del Principáu”. Isidro Martínez Oblanca va encargase de coordinar la campaña y Cristina Coto va dirixir la ellaboración del programa eleutoral.

Otru movimientu destacáu ye la coalición formada polos valencianos Compromís y Equo. Los ecoloxistes, que van ocupar el númberu 2 de la candidatura, tán acabantes d’anunciar la persona ganadora de les primaries, el francés Florent Marcellesi, residente nel Estáu dende 2004.