Conceyu Abiertu acueye una proyeición sobre la toponimia de Carreño y un coloquiu posterior

La Xunta pola Defensa de la Llingua Asturiana entama esti xueves, a les 20.30 hores, una proyeición sobre la toponimia de Carreño y un alderique posterior. El videu que va poder vese ye’l fechu apocayá pol coleutivu Anonymous AST.
 
Los presentes nesti espaciu asitiáu en La Gascona númberu 12 d’Uviéu van poder ver el documentu audiovisual que fixo esti coleutivu pa demostrar que los topónimos recoyidos pola Xunta Asesora y oficializaos son los tradicionales del conceyu de Carreño. Na pieza, de cinco minutos de duración, Anonymous AST amuesa al traviés d'unes videu-imaxes a les que tuvo accesu, el llabor de trabayu de campu fechu nel llugar pol llingüista Fernando Álvarez-Balbuena xunto con Ramsés Ilesies Fernández y Xosé Antón Fernández ‘Ambás’ ente finales del añu 2010 y primeros del 2011. D’esta forma pue comprobase como homes y muyeres de Carreño reconocen los topónimos Quimarán, Prevera, Llorgozana, Priendes o El Pielero, como los que sintieron tola vida.
 
Nel debate posterior a la proyeición d’esti videu van tar los tres espertos que fixeron el llabor de recopilación de los testimonios de los vecinos de Carreño y el realizador Pablo Quiroga. El titulu d’esti actu entamáu pola Xunta pola Defensa de la Llingua Asturiana ye ‘La voz de la xente: el procesu de recuperación de la toponimia’.