Concentración en Xixón por una Europa solidaria

El vienres en Xixón a les 19.30 "polos derechos de les persones refuxaes"

A traviés d'un eventu en Facebook ta espardiéndose una convocatoria que nun entama nenguna entidá nin colectivu, na que s'afita que "la xera urxente, ensin dulda la más urxente, que tien delantre d’ella la ciudadanía europea ye precisamente esa: escuchar les demandes d’eses persones, cumplir pa con elles un deber d’acoyida, face-yos un güecu nel nuestru continente avieyáu".

Según los organizadores "ye xusto la ciudadanía europea la que ta demandando, pel so llau, que-y dexen cumplir esi deber, y nun val que dellos gobiernos se muestren renuentes, remisos, pusilánimes o directamente hostiles énte una obligación moral y xurídica, recoyida na Convención sobre Refuxaos de les Naciones Xuníes".

El testu finaliza esixendo que "la protección d’eses persones tien qu’incluir obligatorio un tratamientu dignu y respetuosu colos derechos humanos, amás de la garantía de que nun van ser devueltes contra la so voluntá a los países de los que fuxen. El retu seique sía grande, pero lo qu’eses persones esperen de los que nun tienen que cadecer los sos mesmos sufrimientos ye que tean, que teamos, al altor de les circunstancies".