“Con esti primer discu quiximos celebrar los 15 años de Xeitu divulgando la tradición”, apunta'l direutor Pau Santirso

El Teatru Filarmónica va acoyer esti sábadu l’espectáculu que va servir pa presentar el primer discu de Xeitu, que’l grupu de baille tradicional espubliza pa “celebrar los nuesos 15 años”, apunta’l so direutor Pau Santirso. Los 35 miembros de la formación van xubir a les tables de la instalación uvieína pa ufrir los 18 temes del trabayu.

“Va ser un espectáculu d’hora y media de llargor con cuatro collaboraciones”, esplica Santirso. Xose´Antón Fernández ‘Ambás’ y Ramsés Ilesies, investigadores que tienen bien trabayao con Xeitu, y Marga Lorences son los participantes nel discu convidaos, a los que se suma Luis Rozas, de 83 años, que va abrir el conciertu con canción asturiana nún de los momentos más especiales y emotivos del eventu.

“El discu ye mui variáu. Ta compuestu por 18 temes del occidente, centru y del oriente que respeten la tradición, incluyíos en 15 tracks. Hai pieces de siega, de ronda, xotes, muñeires… Nun son toes pal baille, yá qu’hai hasta un cantar de boda”, esplica’l direutor de Xeitu. Tamién se cuida muncho nel discu la fala y pronunciación de cada zona, “llabor nel que nos ayudó Ambás y Ramsés”.

Los 35 miembros de Xeitu van poner n’escena estos temes con una indumentaria non tradicional. Un espectáculu que va ser únicu, yá que la intención de Santirso ye que nun tenga más percorríu, salvo pequeñes amueses que se puedan facer del mesmu posteriormente pa TPA o dalgún eventu concretu.

Poro, anima a les asturianes y asturianos a acudir al conciertu, previstu pa mañana a les 20 hores, con entrada llibre. Na puerta va poder mercase’l discu en formatu CD o n’USB y camisetes, con diseñu de Miguel González Díaz.

Un trabayu col que “quiximos celebrar los 15 años de Xeitu divulgando la tradición”, asegura Santirso, que recuerda momentos bonos y malos nesti tiempu. Asina, apunta cuando la formación contaba con 10 miembros, situación que cambió nel momentu d’entamar la escuela de baille tradicional hai agora 7 años, cantera d’integrantes nuevos de Xeitu que tien anguaño 150 persones de toles edaes interesaes en deprender a baillar asturianu.

Per llau de los momentos inolvidables, que son la mayoría, cita “la partipación nel Festival Interceltique de Lorient nel 2013 nel añu d’Asturies, lo que nos permitió tener una actuación más llarga nes nomaes daquella ‘Nueches máxiques’, o la segunda del 2017. Tamién les grabaciones pa la TVG, l’asistencia a un festival de cultura del mundu en Girona o la participación cola nuesa carpa en L’Ascensión”, rellata Santirso, qu’anuncia la esistencia de proyeutos nuevos en mente y la intención de qu’esti discu sía’l primeru de munchos.

Na semeya, un momentu de la grabación del discu.