“Con ‘Ástor’ pretendemos avera-y a la xente la realidá de la cultura asturiana y amosala al mundu”, asegura Morán

|
Ángel Villa, Xosé Ramón Iglesias Cueva y Fernán Morán númberu 18 'Ástor'

Yá ta disponible’l númberu 18 de ‘Ástor’, el cartafueyu de la Lliga Celta d’Asturies, que s’edita 30 años depués del 17 en formatu dixital con apéndices en castellanu y inglés. “Pretendemos avera-y a la xente la realidá de la cultura asturiana y amosala al mundu”, apunta’l so direutor Fernán Morán sobre esti proyeutu que se presentó na sede de l’Academia de la Llingua Asturiana (ALLA).

Nacida na seronda del 1981, ‘Ástor’ foi una revista que s’editó hasta l’añu 1990, momentu nel que la primer Lliga Celta d’Asturies cesó l’actividá. “Nel 2015 un garrapiellu de persones quiximos resurdir la Lliga Celta d’Asturies, dando-y continuidá a lo que venía faciendo nun contestu históricu diferente y otres ferramientes”, esplica Morán, presidente del coleutivu y coordinador d’una iniciativa qu’echó a andar hai añu y mediu.

“Dende un entamu dende la Lliga Celta’l nuesu oxetivu, amás del estudiu y la investigación, ye l’espardimientu. Asina organizamos charres y seminarios nesti tiempu, pero vimos que, nesi sen, teníen pocu sentíu al llegar a poca xente y namái a xente llocal. Teníemos ehí a ‘Ástor’, que llevaba sumida 30 años y que tanta repercusión tuvo nel so tiempu, con suscriptores en tol mundu, hasta profesores de Harvard, y pensamos: ¿por qué non resurdila? Contauté con xente, hebo bona aceptación, y ehí empezó la bola”, rellata Morán.

El resultáu, añu y mediu depués, ye’l númberu 18 del cartafuyu, con siete artículos firmaos por autores de relevancia. “Ye una revista cultural que trata aspeutos de la cultura asturiana de cualquier campu, como l’arqueoloxía, l’astronomía, la botánica, la mitoloxía…, dende un puntu de vista pancélticu. Pretende afirmar esi entendimientu pancélticu de la nuesa cultura y la nuesa sociedá”, esplica.

Asina, nesti ‘Ástor’ atopamos los artículos ‘Mitos y tradiciones del mar Cantábricu’, pol etnógrafu, dibuxante y escritor Bertu Álvarez Peña; ‘El raigón arqueolóxicu, míticu y cultural de les fiestes celtes de l'Asturia Cismontana’, pol inxenieru y investigador n'astroarqueoloxía Miguel Ángel González González; ‘Averamientu y catalogación de los texos de Asturies’, pol biólogu y miembru de la Sociedá Asturiana de les Ciencies Sabiencia, Bertu Ordiales; ‘El Castiellu de Llagú, notes sobro un casu con desenllaz llamentable pal Patrimoniu Cultural d'Asturies’, pol doctor arqueólogu del Museu Arqueolóxicu d'Asturies y miembru del Real Instituto de Estudios Asturianos, Ángel Villa; ‘Vieyos testimonios so'l celtismu astur’, pol etnógrafu y miembru de la Fundación Belenos, Gauson Fernande; y ‘La llingua celta bretona’, pol caderalgu d'Español y profesor de bretón Gwenael Emelyanoff; amás del testu ‘Hestoria de la Lliga Celta d’Asturies’ firmáu pol propiu Morán.

En total son 80 páxines con ilustraciones y semeyes, a los qu’hai que sumar los dos apéndices colos testos tornaos al castellanu y asturianu. La so merca ta disponible namái en llinia, a un preciu de 3 euros, con pagu per Pay Pal, y el recibimientu ta siendo bonu, “con ventes n’Estaos Xuníos, Australia, Gales y munches en Breizh pol fechu del artículu sobre’l bretón”, amás de “numberoses felicitaciones procedentes d’otres naciones celtes”.

Y ye que l’oxetivu principal de ‘Ástor’ ye “avera-y a la xente la realidá de la cultura asturiana y amosala al mundu”, polo que s'apostó, por temes de gastu y loxística, pol formatu dixital, “yá que ye más fácil llegar a la xente de fuera; namái tienen que tener un dispositivu móvil y conexón a Internet pa poder acceder a los conteníos de la revista”. Nel casu de qu’hubiera muncha demanda, Morán nun descarta la edición en papel con una tirada curtia, “como podíen ser 200 exemplares, cola versión namái n’asturianu pa coleicionistes”.

Presentación n’Uviéu

La presentación d’esta etapa nueva de ‘Ástor’, que nun principio va tener calter añal, celebróse’l xueves nel llar de l’Academia de la Llingua Asturiana’ (ALLA). Morán tuvo acompañáu de Xosé Ramón Iglesias Cueva, secretariu de l’ALLA, que manifestó’l compromisu de la institución con toles iniciatives qu’empleguen l’asturianu como llingua vehicular y destacó’l formatu y conteníos del cartafueyu, y por Villa, que comentó a los presentes el so críticu artículu ‘El Castiellu de Llagú, notes sobro un casu con desenllaz llamentable pal Patrimoniu Cultural d'Asturies’.

Na imaxe, Villa, Iglesias Cueva y Morán. Semeya obra d'Anselmo Coto.

AdxuntuTamañu
Image icon Portada númberu 18 'Ástor'93.35 KB
Contador Estadistiques