Compromisu y independientes aconceyen pa dar una voz a Asturies na esperada reforma constitucional

Na mañana d'esti sábadu va celebrase n'Uviéu la primer reunión de trabayu entamada baxo'l paragües de Compromisu por Asturies pa trabayar nel oxetivu de contar con una voz propia dende Asturies na esperada reforma constitucional. Nella participarán independientes y asturianistes de Podemos y les candidatures de xunidá popular.

Nesta primer sesión van ponese les bases d'esta iniciativa que se pretende abrir a otres formaciones y coleutivos en reuniones de trabayu próximes. L'oxetivu ye "dar una voz a Asturies na reforma del procesu constituyente que s'avecina; ver qué papel ha de xugar Asturies nél", esplica Xune Elipe, conceyal de Somos Avilés convidáu por Compromisu por Asturies, organización que sofita'l proyeutu de Podemos dende'l so entamu, a la reunión de mañana que va tener como sede'l Llar La Llegra.

Ensin dulda, un pasu importante pa un procesu clave pal país nel qu'Asturies nun pue volver a quedar atrás. "Queremos visualizar que l'asturianismu sigue vivu pese a qu'estratéxicamente tea trabayando nuna organización estatal; que tenemos una voz propia", añade Elipe.