Compromisu por Asturies va sofitar la candidatura de Podemos a les eleiciones europees

Daniel Fernández, voceru de Compromisu, anunció que la federación va sofitar la candidatura de Podemos a les Europees, anque reconoz “lluces y solombres nel procesu”. El xueves va presentase n'Uviéu'l procesu de Primaries.

La eliminación del criteriu de territorialidá como elementu correutor dientru de les Primaries de Podemos, “cuestión que na presentación d’Uviéu díxose que diba incorporase a tal procesu, lo qu’amuesa que’l grupu promotor asítiase un paso per detrás de los círculos d’Asturies en superar el réxime del 1978, onde la territorialidá ye una cuestión fundamental pa superar el réxime heredáu del franquismu, que debería afrontase ensin mieu dende un procesu que se manda de la etiqueta de rupturista colo esistente”, supón l’asuntu que más rocees crea en Compromisu por Asturies, al igual que “la falta d’esplicación y de participación de los círculos en tal decisión”. Fernández califica esta situación de “error que queremos correxir con una mayor participación de los círculos, ameyorando la horizontalidá del procesu”.

Compromisu apuesta nes eleiciones al Parllamentu Européu del 25 de mayu “por movimientos de confluencia n’Asturies que trabayen por superar el réxime del 1978 nel Estáu español y el gobiernu de la Troika n’Europa, algamando el mayor pesu posible pa les candidatures asturianes”, polo qu’anuncia l’apoyu de la candidatura asturiana al procesu Podemos “pa llograr que dalguna asturiana o asturianu venceyáu a les distintes lluches sociales del país aporte a les instituciones europees, yá que, como asturianistes, la nuestra primer prioridá ye ser quien a qu’Asturies tea representada en toles instituciones onde se deciden cuestiones que nos afeuten de manera direuta”.

Pablo Iglesias, mañana n’Uviéu

El profesor universitariu madrilanu Pablo Iglesias, cara más destacada de Podemos, va tar mañana n’Uviéu nel actu de presentación del procesu de Primaries d’esta iniciativa popular. Ésti va tener llugar a les 20 hores nel Auditoriu d’Uviéu y nél tamién va tomar parte los candidatos asturianos Estefanía Torre, vocera de la plataforma Democracia por Cuideiru; Daniel Ripa, psicólogu social y periodista; Tania González, profesora de Formación Profesional; y Orlando Fernández, xestor cultural.