Compromisu por Asturies fala d’un “ataque brutal” a la llingua asturiana cola sida de la crisis

La mengua de 60.771,37 euros a les subvenciones al asturianu aprobada por Cultura lleva a Compromisu por Asturies a falar d’un “ataque brutal” a la llingua asturiana. La federación de partíos cree que detrás hai motivos “ideolóxicos”.

Yolanda Huergo, vocera de Compromisu, afirmó que “si la cultura ye una de les principales perxudicaes pola baxada de presupuestos, y la cultura asturiana va vese especialmente desprotexida pola falta d’inversiones y presupuestos específicos, la llingua va vese especialmente perxudicada polos prexuicios ideolóxicos de la xente que nos gobierna”. La baxada de diez millones de les antigües pesetes a les perres aprobaes pol Gobiernu anterior de Foro Asturias Ciudadano –que yá fixera una mengua importante con respeuto al añu anterior– pa les ayudes a la normalización del asturianu del 2012, provoca un descensu total del 61,53 por cientu en comparanza cola partida destinada nel 2011.

La llingua asturiana “al nun tener oficialidá nin esistir una política normalizadora afayadiza” ta nuna situación delicada, considera Huergo, qu’afirma que “la promoción y l’apoyu del PSOE” al idioma “nun vien d’una convicción propia, sinon de la movilización social y la voluntá de la mayoría de la sociedá asturiana, incluyendo votantes de los partíos mayoritarios, que nes décades pasaes apoyó un procesu de normalización que dende l’alministración trató de ralentizase”. Agora, la crisis ta valiendo pa que’l Gobiernu del país, “que nun tien nengún interés real cola normalización de la llingua asturiana, tenga una oportunidá pa desentendese cola sida de la situación económica; ello pue vese nesti recorte desproporcionáu y mui perriba de la media d'otres partíes”.

Compromisu por Asturies esixe “una rectificación” al Gobiernu sobre esti recorte y reclama-y “claridá na política llingüística”. Al mesmu tiempu, la federación de partíos ufrierta  apoyu “a les aiciones o iniciatives que puedan llevar alantre organizaciones cíviques o defensores de los derechos llingüísticos pa tornar estos ataques”.

Apoyu a la marcha del 15-S en Madrid

La organización nacionalista anunció qu’apoya la marcha prevista mañana en Madrid y que una delegación de Compromisu va desplazase a la capital castellana. "L'amenaza de los retayos y el retrocesu brutal nos derechos llaborales y sociales faen necesariu'l sofitu a les respuestes que s'articulen y coles que se debe dar al Gobiernu del Estáu un avisu contundente que-y faiga rectificar la situación actual". La federación de partíos plantégase que “la presencia na marcha faese con un espíritu d'unidá na respuesta y de la necesidá d'un mensaxe nidiu y conxuntu, pero ensin escaecer que parte de los convocantes tienen una gran parte de responsabilidá na situación actual, especialmente nun país como Asturies, nel que coxestionaron un modelu económicu nos postreros 30 años que nos llevó a la situación na que nos atopamos, y que s'agrava poles polítiques selvaxes del PP y ponse de manifiestu que nesta y na anterior llexislatura'l PSOE ta aplicando en Asturies una política de retayos en servicios públicos”.