Compromisu por Asturies decide sofitar el proyeutu Podemos

Nun Conceyu Abiertu celebráu’l sábadu pol procedimientu d’urxencia, Compromisu por Asturies decidió sofitar y participar nel procesu constituyente de Podemos Asturies. Ésti ye un proyeutu políticu xestáu alredor del televisivu Pablo Iglesias.

“Compromisu por Asturies decidió güei –pol sábadu– nel so Conceyu Abiertu sofitar y participar nel procesu constituyente de Podemos Asturies, de la mesma forma qu’anima a la izquierda, l'ecoloxismu y al asturianismu políticu a participar nel procesu p'arriquecelu coles sos aportaciones”, anunció la federación de partíos entamada pol Bloque por Asturies, Unidá Nacionalista Asturiana (UNA) y independientes. Los militantes consideren “mui positivu'l calter abiertu y participativu del nuevu procesu constituyente n'Asturies, mui na llínea de lo que s’aprobara nel Congresu Fundacional de Compromisu por Asturies en xunu del 2012”, polo que se sumen a la estaya asturiana d’esti proyeutu políticu nacíu dende la indignación de la ciudadanía y lideráu pol profesor universitariu Pablo Iglesias, conocíu pola so participación en dellos alderiques televisivos de canales estatales. El madrilanu, que presentó’l vienres en Xixón la iniciativa, pretende configurar una cantidatura pa les eleiciones europées del 25 de mayu, lo que dexaría a Compromisu fuera de la candidatura xunitaria del nacionalismu asturianu que buscaba Andecha Astur dientro de la coalición qu’entama Euskal Herria Bildu con otres formaciones soberanistes del Estáu.

El comunicáu asoleyáu pola federación de partíos continúa esplicando que considera básico “abrir el camín a superar el réxime de la Transición y de la Constitución de 1978 qu'estableció el sistema políticu-empresarial onde los dos partíos mayoritarios PP y PSOE, son el garante de los intereses de una minoría económica que s'arriquez cola privatización de los servicios públicos y la eliminación de los drechos de la mayoría social”. D’igual forma, la organización ve fundamental “qu'Asturies recupere la so soberanía económica, política y cultural frente a les instituciones europees gobernaes por entidaes ensin cálter democráticu nengún, como la Troika, el BCE o'l FMI”.

Na semeya, Pablo Iglesias na presentación de Podemos Aragón celebrada la selmana pasada.