Compromisu por Asturies critica les declaraciones “machistes” de Cantó y esixe esplicaciones a UPyD

“Intolerables y fondamente machistes”. Asina califica Compromisu por Asturies les declaraciones feches pol diputáu d’UPyD Toni Cantó en Twitter. L’actor afirmó que la mayoría de les denuncies por violencia de xéneru son falses.

'La mayor parte de las denuncias por violencia de género son falsas. Y los fiscales no las persiguen. Las estadísticas son sesgadas' foi’l primer tweet que xubió ayeri a la rede Cantó y que provocó la reaición rápida de los internautes. En llugar de rectificar, el diputáu nel Congresu por València d’UPyD ratificóse na so postura basándose nunes estadístiques de la Federación de Afectados por la Ley de Género, cola que se reunió esa mesma mañana. Cinco hores depués, Cantó pidió perdón, tamién por Twitter: ‘Pido disculpas. Me he equivocado al dar por contrastados unos datos de Feder.Gen sobre un tema tan grave como es la violencia de género’.

Nuria Rodríguez López, responsable de Movimientos Sociales de Compromisu por Asturies, amás de criticar la postura amosada pol actor, reclama a UPyD que “esplique de manera conveniente si ésta ye una opinión particular o si obedez al ideariu de base del partíu”. La federación de partíos recuerda al diputáu que “la violencia machista mata, concretamente diez muyeres no que va d'añu,  y que se trata d'un problema estructural que requier d'un compromisu políticu fondu y d’una sensibilidá humana que poco tienen que ver con ‘colgar’ comentarios gratuitos y absurdos nes redes sociales”.

“Suxerir que les muyeres son responsables del 70 por cientu de los suicidios d'homes o que los malos tratos son un negociu pal Estáu indica la fondura d'analís de la que ye quien el señor Cantó, amás de ser ensin dulda, un actu d'irresponsabilidá política que manifiesta'l total y absolutu desconocimientu de la situación”,  añade Rodríguez López. Por último, la responsable de Movimientos Sociales de Compromisu esixe a Ignacio Prendes, diputáu d’UPyD na Xunta Xeneral, qu'esclarie lo más pronto posible “si comparte les afirmaciones del so compañeru de files, porque la sociedá asturiana, muyeres y homes, merecemos una esplicación y una aclaración sobre l'ideariu d'esti partíu que, cola escusa de nadar nel centrismu políticu, nun fai más qu’escorar, y de forma cada vez  más nidia, contra una derecha impositiva y fondamente conservadora”, pa depués añadir que “nun asitiase en contra ye similar a aplaudir eses afirmaciones”.