Compromisu entama una campaña que busca tresparencia na política

‘Frente a la #Cleptocracia#Compromisuéticu’ ye’l nome de la campaña que ta acabante de poner en marcha Compromisu por Asturies. Ésta trata de buscar tresparencia na política y denunciar la corrupción nos partíos grandes.

Asina, una de les primeres midíes ye dar a conocer los ingresos de los cargos públicos que tien la federación de partíos, principiando col conceyal de Carreño por UNA-Bloque por Asturies, Roberto Holgado. L’edil, según anuncia Compromisu, percibió un total de 3.920 euros en conceutu de dietes pola so asistencia a 83 comisiones y 15 plenos a lo llargo del 2012.

“#Cleptocracia ye la denuncia que facemos dende Compromisu por Asturies d'un sistema políticu infectáu pola avaricia y el clientelismu. Les persones, y partíos políticos que lu sostién y protexe, róbennos gracies a una política qu'en cuenta de tar al serviciu de la mayoría social, del pueblu, conviértese les más de les veces nuna máquina implacable de tresferir perres y recursos de lo público a lo privao”, espliquen los nacionalistes, qu’acusen a los partíos grandes de provocar una degradación ente la sociedá de la so percepción de la política. Por esti motivu, #Compromisuéticu ye l’apueste de la federación de partíos. “Nun vamos dexar que nos saquen del tableru, porque reclamamos la política de toes y pa toos. La #Cleptocracia combátese dende la propia política, amosando les diferencies ente ellos y les persones que, como los conceyales de Compromisu por Asturies, trabayen de manera llimpia, sincera, cercana y arguyosa pol so conceyu”, afirmen dende la organización, que diz tar “arguyosa” de mostrar a “los nuestros votantes, simpatizantes y les persones qu'éntá nun nos conocen, el nuestru #Compromisuéticu con una sociedá más xusta ya igualitaria”.