Compromisu critica al Conceyu de Xixón por fomentar los toros ente los neños con clases de toréu

|

Mediu centenar de neños y neñes participaron nes clases de toréu que s’impartieron esti martes na plaza de toros d’El Bibio. Compromisu por Xixón considera “llamentable” que se gaste dineru públicu n’educar “nel maltratu animal”.

Dos profesionales del toréu, Javier Castaño y Raúl Gracia ‘El Tato’, encargáronse d’enseñar a los pequeños, munchos d’ellos procedentes de fuera del país, fundamentos col capote delantre de la mirada atenta de los sos padres. Esti eventu, que, al paecer, ye la segunda vegada que se celebra, forma parte de les actividaes paraleles de la Feria de Begoña que fina mañana tres la celebración d’una novillada y cinco corríes nel 125 aniversariu de la plaza de toros xixonesa.

Pa Compromisu por Xixón, que la selmana pasada yá amosó’l so refugu a la nomada ‘Fiesta’, ye  “llamentable” que s’utilice dineru públicu “n'educar a los neños nel maltratu animal” y recordó que “el mesmu gobiernu que llenda les ayudes d'emerxencia social, gasta'l dineru nesti tipu d'actividaes”. “L'apueste por fomentar una afición polos toros rescampla nuna ciudá onde nun esiste y nun da pa caltener l'actividá de la plaza d'El Bibio, yá que los empresarios que la xestionen siempres dicen que tienen perdes pero siguen presentándose pa xestionala, lóxicamente porque hai otru tipu de sofitos públicos, anque se nieguen”, afirmó’l so voceru, Daniel Fernández, que tamién destacó que “tenemos una alcaldesa, conceyala de Medioambiente para más inri, que declaró sagraos los toros en Xixón, y bien ciertu que va gastar lo que faiga falta por caltenelos”.  

“Ye llamentable que na zona del Estáu con más refugu a los toros tengamos un gobiernu municipal totalmente insensible al maltratu animal y que tien la caradura de dicir que nun hai dineru p'asuntos muncho más serios y éticos, pero sí pa clases de toréu”, critiquen dende Compromisu.

Semeya fecha por Jacinta Lluch Valero. Imaxe baxo llicencia Creative Commons Attribution-Share Alike 2.0 Generic.

Contador Estadistiques