Compromisu acusa al “tripartitu” de mirar más por cumplir los oxetivos de Madrid que polos paraos del país

|

Los datos del Encuesta de Población Activa que sitúa’l númberu de paraos n’Asturies en 114.000 lleva a Compromisu a criticar l’aición del “tripartitu”. Acúsalos de mirar más por cumplir los oxetivos marcaos por Madrid que polos paraos.

Yolanda Huergo, vocera de la federación de partíos, calificó de “intolerables” los datos de la Encuesta de Población Activa (EPA) del 2012, nos qu’Asturies lidera la xuba del paru (un 26,13 por cientu), situando’l porcentaxe de desemplegaos nel 23,76 por cientu, una cifra, sicasí, inferior a la media estatal (26,02 por cientu). “La obsesión por cumplir los oxetivos de déficit marcaos por Madrid ta afogando entá más la economía asturiana, actuando como una bomba de recimu que destrúi hasta l'últimu rincón del nuesu texíu granible”, afirmen los nacionalistes, que critiquen que mientes esto acocede “l’Estáu incumple con Europa” y obliga a Asturies “a tener un 10 por cientu menos d'endeldamientu que Valencia pa que puedan pagar avales a equipos de fútbol”, en referencia a los 118 millones d’euros que la Comunitat Valenciana ha d’abonar por avalar préstamos bancarios al Valencia (86 millones), l’Elche (14) y l’Hércules (18). Con esti gastu, amás, pasará a ser el máximu accionista d’estos trés clubes.

Pa Compromisu por Asturies, “el tripartitu de PSOE, IX y UPyD escaecióse de les paraes y paraos, lo qu'esplica qu'Asturies lidere la xubida de paru en tol Estáu, y punxo como exemplu a “los trabayadores de Suzuki que denunciaron insistentemente l'abandonu del Principáu cuando Suzuki tien enforma qu'esplicar, como pa qué plantegó un ERE si tenía claro que diba cerrar polos supuestos elevaos costos de producción”. Huergo tamién destacó que somos el territoriu “con menor tasa d'actividá de tol Estáu, con un 52,37 por cientu, lo que conderga a Asturies a la decadencia económica, con un avieyamientu de la población a un ritmu creciente”, dalgo qu'esixe, según Compromisu, “planes específicos tantu pa parar la sangría de la emigración de los nuesos mozos como oportunidaes llaborales na zona rural pa evitar que siga perdiendo población, yá que, como siempre, ye la gran escaecida en toles politiquees; na llaboral tamién”.

Tertulia Pachín de Melás

El martes, a les 20.30 hores, la Tertulia Pachín de Melás va celebrar en Xixón un alderique nuevu. Nesta ocasión el tema a tratar ye la cooperación: ‘Malos tiempo pa la solidaridá. Golpes baxos a la cooperación internacional’. Les persones convidaes a participar nesta actividá entamada por Compromisu por Asturies son Javier Orozco, representante del Colectivu de Colombianos/es Refuxaos n'Asturies Luciano Romero Molina; Jorge Coque, d’Inxeniería Sin Fronteres d’Asturies (ISFA); y Mercedes González, presidenta de la Coordinadora d’ONGD del Principáu d'Asturies. Rafael Palacios, ex direutor de l’Axencia Asturiana de Cooperación al Desarrollu encargaráse de la presentación d’esti eventu qu’acueye, como ye vezu, el Bar Cantábrico (cai Muelle d’Oriente, 3), frente a los Xardinos de la Reina.

 

Contador Estadistiques