Como queden los ayuntamientos

Xixón vive'l cambiu más fuerte de representación política, col PSOE pasando de 16 conceyales a 13, mientres que'l PP xube de 9 a 11. N'Uviéu el popular Gabino de Lorenzo amenaza con facese incombustible y repite mayoría absoluta con un conceyal más de propina sobre los que tenía. Izquierda Xunida-BPA pierde l'alcaldía de Llangréu, la más importante que tenía, a manes del PSOE y recula enforma respective a va cuatro años, lo que vien a emporcar los bonos resultaos de la coalición. Eses son les notes más importantes no que se refier a los grandes conceyos asturianos. Otramiente, Siero repite la situación de va cuatro años y dexa la puerta abierta a repetir el tripartitu, mientres que en Mieres el PSOE sigue de primer fuerza, anulando'l "sorpasso" que contaba con dar IU. P'acabar, empate técnicu a diez conceyales ente PSOE y PP n'Avilés con mayoría de votos pa los populares.

IX, que queda con Grao d'alcaldía más importante, va tener asina la llave pa que'l PSOE pueda gobernar en bien de conceyos importantes, ente ellos Xixón, Avilés o Cangas del Narcea. Los socialistes amarren 31 mayoríes absolutes y 14 relativesnos conceyos asturianos, el PP tien 13 absolutes y 13 relatives, IX tien dos relatives (Grao y Degaña) y URAS una absoluta (Sariegu) y otra relativa (Eilao).

Peles ales, Antonio Trevín amarra l'alcaldía de Llanes pal PSOE con mayoría absoluta de más del 50% de los votos, pero los socialistes pierden en Ribesella contra'l PP, qu'igua l'argayu de votos cola URAS nel 99. Nel occidente, l'alcaldía de Cangas del Narcea ye la que más cambia, nella'l PSOE tien más votos pero los mesmos conceyales que'l PP, colo que tamién va necesitar de pactos. Ver equí los resultaos finales de les municipales dende'l web oficial del Ministeriu del Interior