“Como agua de mayo” primer discu de Gueta na Fonte

El grupu musical de Mento Hevia, que tenía hasta agora asoleyaos cuatro cantares nel discu compilatoriu "Nuevu folk asturianu volume IV" de L'Aguañaz, asoleyen agora esti primer discu en solitario nel que lleven trabayando cuásimente l'añu enteru.

El discu lleva 16 cortes, de los que cuatro son tradicionales de los países celtes y los otros doce composiciones orixinales de Mento Hevia, fundador del grupu allá pel añu 2.000. Juan Povedano, Luis García Ampudia, Daniel Álvarez Mora, Vanesa Vez Caraduje, José Francés, y Nancy Quintáns de la Prida completen la formación de Gueta na Fonte nesti discu pal que tamién collaboraron Xuaco la Miranda,
El percusionista de La Bandina David Varela y el Coro Capilla Clásica de Lluanco baxo la dirección de Facundo Artime.


A la hora d'asitiar l'estilu del grupu, los miembros de Gueta na Fonte piden que nun se-yos ponga la etiqueta de "celta" y quieren más falar d'un estilu "Asturgaélicu, de forte componente Atlánticu y Neorománticu". El mesmu grupu sorraya que nun se trata d'un discu "pa puritanos del folk, pero incluso a ellos pue que-yos guste" anque dende llueu el grupu busca públicos más amplios y ellos mesmos sorrayen que por ritmos y estilos el discu nun ta fechu "solo pa menores de 40 años". La evocación y l'ensoñamientu son característiques del soníu de Gueta na Fonte.