Comienza la tercer edición de CaleyAvilés

Cinco visites guiaes conformen esti añu la iniciativa de la Estaya de la Llingua.

CaleyAvilés permite descubrir los secretos de la ciudá y dalgunos de los sos sitios más emblemáticos en llingua asturiana. Esta edición va comenzar güei, coincidiendo col Día Internacional de los Museos, con un percorríu pol Muséu de la Historia Urbana d'Avilés con aniciu a les 19 hores (inscripciones nos teléfonos 985.56.55.12 o nel corréu electrónicu museodeaviles@ayto-aviles.es).

El restu de salíes van tener llugar el primer vienres de los meses próximos, de xunu a setiembre. Éstes van ser al parque de La Madalena (1 de xunu); al barriu de Sabugo, parque d'El Muelle y paséu de la ría (6 de xunetu); al parque de Ferrera (6 d'agostu); y al cascu históricu (7 de setiembre).

Les visites van comenzar siempre a les 19 hores, van tener un llargor d'hora y media y van tar llendaes a 25 places. P'apuntase hai que llamar al númberu de teléfonu 985.54.55.08 o mandar un corréu electrónicu a la direición estayallingua@ayto-aviles.es.