Comienza la campaña eleutoral cola tradicional pegada de cartelos

Esta medianueche principia la campaña eleutoral na que los partíos van tratar de convencer a los asturianos pa ganase’l so votu. Un total de 16 formaciones preséntense por Asturies a la cita coles urnes del 20 de payares.
 
Per delantre queden 15 díes de mítines y discursos nos que la novedá principal con respeuto a eleiciones xenerales anteriores ye la participación de Foro Asturias Ciudadano, partíu asturianu con aspiraciones series pa conseguir representación nel Congresu tres algamar la presidencia d’Asturies. La formación de Francisco Álvarez-Cascos abrió la campaña con un actu en Ḷḷena, a la entrada de los túneles de la variante de Payares.
 
Nel ámbitu nacionalista, Andecha Astur ye la única formación que se presenta nesta ocasión. Arturu Xosé Bermeyu ye’l candidatu al Congresu del partíu, qu’esta tarde emitió una nota p’anunciar la presentación d’una denuncia ante la Xunta Eleutoral pola retirada de pancartes preeleutorales por parte de los servicios municipales de llimpieza de Xixón y Avilés.
 
El llistáu final de candidatures pa la cita coles urnes del 20 de payares ye la siguiente: PSOE (Antonio Trevín), PP (Mercedes Fernández), Izquierda Xunida (Gaspar Llamazares), UPyD (José Ignacio Prendes), Andecha Astur (Arturu Xosé Bermeyu), FAC (Enrique Álvarez Sostres), PCPE (Raúl Martínez Turrero), Solidaridad y Autogestión (Francisco Goméz del Castillo), PACMA (Marta Jimeno), Partido Humanista (Juan Antonio López Gómez), Por un Mundo más Justo (Isaac Rafael Álvarez Fernández), Equo (María del Pilar Calvo Holgado), Unificación Comunista de España (María de las Mercedes Torre), Partido Democrático y Constitucional (Arturo García Rodríguez), Hartos.org (Miguel Ángel Villalba Menéndez) y Escons en Blanc (Luis Prado). Pal Senáu preséntense los mesmos partíos, a esceición del Partido Democrático y Constitucional.