Comiencen en Colunga los XXII Alcuentros cola Cultura Tradicional d’Asturies

Una visita guiada al taller de rederes de Llastres abrió los XXII Alcuentros cola Cultura Tradicional d’Asturies qu’entama’l Conceyu de Colunga. Cantares de chigre y conciertos completen una programación que va allargase hasta’l día 25.

Los visitantes van poder conocer, en dos turnos (12 y 13 hores), esti oficiu tradicional que consiste n’iguar les redes rotes de los pescadores, llabor que realizaben les muyeres de les poblaciones de la mariña. L’actividá va continuar mañana, con cantares de chigre de magar les 13 hores pelos bares y places de Colunga, y la participación de Manuel Collado y el gaiteru Vicente Prado ‘El Pravianu’.

El vienres tola xente interesao va poder facer otra visita guiada de baldre, nesta ocasión al taller del luthier Miguel Alonso Cachafeiro en Colunga, que va mostrar tol procesu de fabricación d’una gaita. Pa participar nella ye necesariu acutar plaza en cualquier de los cuatro turnos previstos ente les 12 y 14 hores hasta mañana na Casa de Cultura de Colunga o al traviés del teléfono 985.85.21.54.

Los cantares de chigre, mentes, van tornar el martes, pero a Llastres. Dende les 13 hores, Odón García González y el gaiteru Javier Noriega van percorrer los bares y places del pueblu animándolu con canciones populares.

Sidra, mercáu y el Coro Manín

Completen les actividaes d’esta cita añal cola cultura asturiana una visita guiada al llagar de Sidra Crespo y una actuación del Coro Manín. La cita cola bébora nacional va ser el miércoles viniente al meudía y los asistentes van percorrer la pumarada, el propiu llagar y prebar la sidra, too ello de baldre inscribiéndose hasta’l llunes.

Mentes, el coru llastrín va poner el ramu a los XXII Alcuentros cola Cultura Tradicional d’Asturies el martes 25, a les 20 hores, na ilesia prerrománica de Gobiendes. Pente medies de les dos actividaes, del vienres 21 al domingu 22, va instalase’l XIII Mercáu Tradicional nos Alcuentros de Colunga na plaza’l Monumentu, con esposición y venta de productos artesanales y agroalimentarios, talleres y munches otres actividaes.