Comiencen les actividaes en Bimenes por mor de la declaración d'oficialidá

El Plenu va declarar esti sábadu l'asturianu como llingua oficial del conceyu yerbatu.

A les 17 hores ta prevista la salida de la ruta qu'abre esta Selmana de la Oficialidá en Bimenes. En concreto, los vecinos y visitantes van percorrer la Sienda de Los Molinos, con salida dende La Llera.

Mañana a les 20 hores, mientres, 'Alderiques d'Asturies', que va tar grabando na Casa les Radios un especial dende les 15 hores, va llevar les sos cámares al Bar Vigil de Santuyano pa la presentación de 'Lluvia d'agostu' nel conceyu yerbatu, llibru de Francisco 'Paco' Álvarez ganador del XXXVI Premiu Xosefa Xovellanos de novela, y del númberu 14 de la revista de lliteratura moza 'Formientu', nesti casu a cargu d'Inaciu Galán. Completa esta actividá, que va poder vese per Muy Muy Televisión, una 'timba poétika' a cargu del coleutivu Fame Poétika.

Un taller de Wikipedia y música y baille con Los Yerbatos , el miércoles; cantares con Ente Muyeres y Peña Careses, el xueves; y cine n'asturianu, el vienres, son les otres actividaes previstes previes a la XX Fiesta pola Oficialidá del sábadu.