Comenzó la V Feria del Llibru y el Discu n'Asturianu

Celébrase del xueves al domingu na Plaza de Domingo Álvarez Acebal d'Avilés.

Per quintu añu, la Direición Xeneral de Planificación Llingüística entama esta feria dientro de les actividaes de la Selmana de les Lletres Asturianes cola collaboración del Conceyu d'Avilés y l'Asociación de Llibreríes del Principáu d'Asturies. L'actu de presentación, celebráu ayeri, contó cola presencia del direutor xerenal Fernando Padilla; l'alcaldesa d'Avilés, Mariví Monteserín; y el presidente de l'Asociación de Llibreríes del Principáu d'Asturies, Rafael Gutiérrez.

L'eventu sirvió tamién pa la presentación de la obra conmemorativa d'esta edición de la Selmana de les Lletres, dedicada a la lliteratura fecha por muyeres. 'Escritores Asturianes. Antoloxía de testos n'asturianu y gallego-asturiano' trátase d'una esbilla de testos de 92 escritores de toles xeneraciones de la nuesa lliteratura que vienen brindando una bayura de planteamientos estéticos de formes anovadores d'encarar l'universu lliterariu y la vida. La presentación foi a cargu de Lurdes Álvarez,responsable de coordinar esta espublización. (Ver presentación de la mesma)

Amás de una amuesa y venta de llibros y discos nel nuesu idioma, nesta feria van tener llugar una riestra d'actividaes como presentaciones de llibros, recitales poéticos, conciertos, cuentacuentos o xuegos. Ver programa de la V Feria del Llibru y Discu n'Asturianu