Comenzaron les rutes pel país de los Trenes Turísticos d’Asturies

Esisten trés alternatives con dos salíes, una en xunetu y otra n'agostu, y un total de cien places disponibles pa caúna d'elles.

'Cais y cantiles' foi'l sábadu la primer salida de la iniciativa Trenes Turísticos d’Asturies, qu'entamen el Gobiernu y Renfe. Ésta, que tuvo llugar el sábadu y va repetise'l 10 d'agostu, sal de Xixón y permite visitar Candás y el Cabo Peñes, con paraes nel mirador del Espíritu Santu, en Muros, y final en Cuideiru enantes de regresar a Xixón.

La próxima salida va corresponder a la ruta 'La sidra y los dinosaurios' y va tener como salida esti sábadu Uviéu –va repetise'l 24 d'agostu–. Inclúi visites al Muséu del Xurásicu d'Asturies (MUXA), asina como a equipamientos y instalaciones venceyaes cola cultura sidrera, tanto en Villaviciosa como en Nava, y una parada en Les Arriondes.

Completa la ufierta 'La biosfera y la mina', que va coneutar Xixón col Parque Natural de Redes. Ésta va desenvolvese los díes 27 de xunetu y 17 d'agostu y inclúi una parada en La Pola Llaviana y una visita al Muséu de la Minería y l'Industria, en L'Entregu.

El preciu pa cada ruta ye de 45 euros por adultu, con tarifa amenorgada de 20 euros pa menores de 4 a 13 años, preciu qu'inclúi los desplazamientos n'autocar a los llugares d'interés pa complementar l'itinerariu. En total va haber 600 places disponibles, 100 por cada ruta y salida.

Na semeya, les autoridaes nun vagón del tren del viaxe inaugural.