Colunga pregunta a Mercedes Álvarez pola situación del asturianu

El diputáu del Bloque por Asturies y portavoz del grupu parlamentariu Mestu, Roberto Colunga, presentó delles preguntes a la conseyera de Cultura y Turismu, Mercedes Álvarez, en rellación a la situación de la llingua asturiana.

Con crítiques a la xestión que la Conseyería de Cultura y Turismo fai en materia de llingua asturiana, el diputáu del BA, Roberto Colunga, fizo once entrugues a la conseyera, Mercedes Álvarez, rellacionaes colos Servicios de Normalización Llingüística (SNL), les subvenciones o’l usu de la llingua poles conseyeríes.

Situaciones como la del SNL de Mieres, que pieslla tolos años; el por qué se da una subvención nominativa a los SNL en cuenta de firmar un conveniu; por qué la Rede de Normalización Llingüística ye namás qu’un logotipu y nun tien ente xurídicu; o’l fechu de que la conseyería de la mesma subvención a los Conceyos que tengan abiertu too’l añu’l SNL o lu piesllen davezu; fueron delles de les preguntes de Colunga a Álvarez.
Usu públicu de la llingua
“¿Por qué nun hai redactáu un Plan de Normalización Llingüística na presente llexislatura?”, “¿Qué exemplos d’usu tresversal de la llingua asturiana nes distintes conseyeríes del Principáu pue poner nesta llexislatura?” o  “¿Por qué la directora xeneral de Política Llingüística fala en castellán n’actos públicos n’Asturies ente público asturiano?”, fueron otres de les formulaciones a les que’l diputáu nacionalista espera respuesta per parte de la conseyera de Cultura y Turismu.