Colunga: "El presupuestu nun responde a les necesidaes del país"

El diputáu del BA, Roberto Colunga, argumentó güei nel Plenu la so enmienda a la totalidá del proyectu de Presupuestu pal 2011. Según opinó, “el proyectu nun responde a les necesidaes del país con garantíes de futuru”.

La Xunta Xeneral del Principáu d'Asturies debatió esta mañana el Proyectu de Llei de Presupuestos Xenerales pal 2011. El Grupu Parlamentariu Mestu, formáu por Bloque por Asturies, y el Popular presentaron enmiendes a la totalidá de los presupuestos, que PSOE y IU-Verdes refugaron. D'esta manera, los socios de Gobiernu afitaron les cuentes que van ser aprobaes la próxima selmana.

Los recortes llaborales y de servicios, la falta de respuestes a les problemátiques que carez Asturies, el caltenimientu de “gastos suplerfuos” o’l presentar un presupuestu “infláu y falsáu”, fueron les principales crítiques que Colunga fixo na so intervención.

“El proyectu de presupuestos pal 2011 y les midíes que los acompañen nun tienen nenguna voluntá nin nenguna capacidá de resolver nengún problema d´Asturies. Nun va contribuyir a salir de la crisis y nun ta pensáu pa favorecer la creación d´empléu nin promover el dinamismu económicu”, indicó’l diputáu del Bloque por Asturies al empiezu de la so intervención.

Siguiendo nesa llínia, Colunga criticó que les midíes d’axuste empobinaes pol Gobiernu del Principáu  afecten a trabayadores, pensionistes y paraos. Amás destacó la emigración como una de les consecuencies: “mozos y moces qu’esti presupuestu pal 2011 nun quier ver, invisibiliza y nun resuelve nengún de los sos problemes”.

Presupuestu “mentirosu”
“Un Presupuestu mentirosu, falseáu, infláu, basáu en previsiones irreales y ficticies”, calificó’l portavoz del Grupu Parlamentariu Mestu al proyectu de llei. Nesti sen, argumentó que va rebaxase 400 o 500 millones dempués de les elecciones de mayu.

Pal diputáu, el presupuestu ye “una operación d’ixenería cosmética de calter electoralista”, basáu en previsiones “irreales y ficticies”.  “Lo único que pretenden ye consiguir una paz ente socios de gobiernu, pa poder con tranquilidá dedicase a l´autoxustificación y a la venta del so productu ellectoral”, indicó sobre PSOE y IU.

Tamién denunció Colunga los “axustaos plazos” pa la tramitación del Proyectu de Presupuestos que, según él, “impiden la realización d’un análisis fondu del mesmu y repercuten negativamente nel necesariu debate social, políticu y económicu”.

Renuncies
Renuncia a una reforma fiscal amplia y progresiva; a una política d’austeridá; a una movilización del mayor volumen de recursos pa financiar la creación d’empléu, l’actividá económica, y la calidá de los servicios públicos y de les polítiques sociales; fueren otros de los aspectos que Colunga refugó d’esti proyectu presupuestariu.

“Nun ye capaz de dar respuesta a les agresiones del Gobiernu de Madrid y, dígase lo que se diga, nun garantiza nin l´aplicación de la Llei de Dependencia, nin el presupuestu destináu a financiar el Salariu Social”, continuó’l parlamentariu del Bloque por Asturies mentantu sorrayaba qye “casi’l 60% de los ciudadanos piensen que’l Gobiernu del Principáu nun tien capacidá pa defender los intereses d’Asturies”.

A lo último de l’argumentación de la so enmienda a la totalidá del presupuestu, Colunga sorrayó qu’esti presupuestu “representa un retrocesu de la inversión social, un recorte salarial y un golpe a los sectores más vulnerables de la población” mientres que “sigue calteniendo partíes económiques que deberíen ser eliminaes, como les subvenciones a los grupos parlamentarios o les retransmisiones televisives multimillonaries, además de chiringuitos múltiples”.

“Nun se compromete nin prioriza les demandes de la sociedá asturiana, poniendo en peligru cuestiones fundamentales como l´empléu, la sanidá o la enseñanza pública”, acabó’l diputáu nacionalista na so crítica intervención contra’l Proyectu de Llei del Principáu d’Asturies de Presupuestos Xenerales pal 2011.