Colunga celebra los XII “Alcuentros cola Cultura Tradicional d’Asturies”

El Conceyu de Colunga celebra dende'l 12 y el 22 de xunetu los "XII Alcuentros cola Cultura Tradicional d'Asturies" un programa cultural qu'incluye canción asturiana, teatru, esposiciones o charres.

El programa va entamar esti xueves 12 dende les 11 cola interpretación de cantares de chigre per Colunga al cargu de los cantantes Avelino Fernández y Manuel García "El Barberu" mientres que'l vienres 13 de xunetu, a les 22:00 hores, la compañía Teatro Kumen va representar "L'aldea perdida", d'Armando Palacio Valdés, na escuela pública de Colunga.

El sábadu 14 a les 19:00h va tener llugar la presentación del llibru-cómic "Les coses de Nardo y Quina", cola participación del so autor, Enrique Carballeira, entamando un programa de charres na "Sala Loreto" que va siguir el martes 17 a les 20:45 hores con Fe Santoveña Zapatero que va falar de "Anécdotes y curiosidaes de la vida sexual na Asturies tradicional". Dientro d'esti programa, el miércoles 18, a les 20:30 h, el folclorista Fernando de la Puente va falar sobre l'aniciu del himnnu asturianu. Na mesma "Sala Loreto" pero cambiando les charres pol teatru el Grupu de Teatru Xana va representar n'asturianu "El vieyu celosu", de Cervantes, y "Mancebu que casó con muyer brava", d'Alejandro Casona.

Un taller de repostería tradicional, y un mercáu tradicional que va facese'l sábadu 21 y el domingu 22, na Plaza de la Casa Conceyu completen estos alcuentros que van contar coles actuaciones musicales de los grupos Ibur y Merlín el sábadu 21 nuna nueche folk que va entamar a les 11:00 de la nueche.